Në periferi të Kharkiv, rusët që tërhiqeshin lanë një dhuratë të fundit… Pallati i Kulturës i Dergaçit është kthyer tashmë në një gërmadhë që digjet, falë një sulmi me artileri të rëndë. Por kjo mund të jetë një nga ndërtesat e fundit në qytetin e dytë të Ukrainës që ka pësuar këtë fat.

Kharkiv quhet kështjellë dhe e ka një arsye të fortë për këtë. Ai i ka rezistuar për më shumë se dy muaj bombardimeve të vazhdueshme. U goditën ndërtesa e njerëz, por qyteti rezistoi, nuk u dorëzua kurrë. Rusët nuk mundën ta thyenin mbrojtjen.

Kryetari i bashkisë së qytetit, Ihor Terekhov, i tha BBC se njerëzit kanë filluar të kthehen dhe se beteja është fituar.

“Nuk kishte trupa ruse brenda qytetit të Kharkiv. Tanket ruse dhe mjetet e blinduara luftarake u eliminuan nga luftëtarët ukrainas. Për shkak të rezistencës së mbrojtjes territoriale të Kharkiv dhe Forcave të Armatosura të Ukrainës, rusët tani janë tërhequr larg nga qyteti, drejt kufirit“, tha Terekhov.

Megjithatë kjo nuk ishte një tërheqje e plotë siç u pa rreth Kievit. Forcat ruse do të ruajnë pozicionet e tyre diku më tutje, ose do t’i bashkohen përsëri luftës diku tjetër. Kjo nuk është një pikë kthese në luftën për Ukrainën, megjithatë është një fitore e madhe.