Reagimet kundër po vazhdojnë gati një javë pas publikimi të “analizës” së Akademisë së Shkencave dhe Arteve të Kosovës.
Një të tillë e ka bërë edhe anëtari i PDK-së, Betim Gjoshi.
Gjoshi me anë të një shkrimi në “Facebook”, ka kërkuar që të dorëhiqet ose të shkarkohet, kryeakademiu, Mehmet Kraja.
Ai ka thënë se analizat e tij do të duhet të ngjallnin reagime të ashpra në Serbi e jo ato të trazojnë popullin shqiptar.
“Në vend se analizat e një akademiku shqiptar, si kjo e Mehmet Krajës, të ngjallin reagime të ashpra në Serbi, ato e trazojnë popullin e vet, shqiptarët. Kjo mjafton që ta kërkojmë të gjithë: DORËHEQJE OSE TË SHKARKOHET KRYETARI I ASHAK-ut, MEHMET KRAJA!”, ka shkruar ai në Facebook.
E titulluar “Synimet destabilizuese të Serbisë në Kosovë dhe në Ballkanin Perëndimor”, në tekstin me 39 faqe, AShAK-u i komenton edhe Serbinë, Kishën Ortodokse, BE-në, Planin e Ahtisarit, Shqipërinë, Maqedoninë e Veriut, Edi Ramën, Vetëvendosjen, Ali Ahmetin, BIK-un, Turqinë, fundamentalizmin islamik, Gjykatën Speciale e shumë çështje të tjera.
Për më tepër, AShAK-u e akuzon edhe shtetin e Kosovës se “pranoi” njohje të sponsorizuara të shtetësisë në mënyrë korruptive.
“Kosova bëri gabim të madh që pranoi njohje të sponsorizuara në mënyrë korruptive, sepse Serbia, po me korrupsion, njohjet e tilla i bëri pothuajse të papërdorshme etj.” – thuhet në analizën e këtij institucioni.