Ambasadori i SHBA-së në Prishtinë, Jeff Hovenier, dy ditë më parë në një prononcim për gazetarë ka thënë se Kosova s’duhet të shqetësohet dhe ta prishë gjumin për shkak të kërcënimeve që vijnë nga Serbia.
Hovenier ka thënë se në Kosovë gjende aleanca më e suksesshme në histori dhe se ka një prani të fuqishme në Kosovë dhe se është e gatshme ta bëjë atë që duhet.

“Ne nuk e prishim gjumin natën për t’u shqetësuar për atë kërcënim. Dhe nuk besoj që populli i Kosovës duhet të mos e bëjë gjumin mirë për këtë, sepse aleanca ushtarake më e suksesshme në histori ka një prani shumë të fuqishme këtu, e gatshme për të bërë të atë që duhet”, kishte thënë Hovenier para gazetarëve.

Një ditë pas kësaj deklarate të ambasadorit Hovenier, kryeministri Albin Kurti, në profilin e tij në ‘facebook’ ka shpërndarë një video, në të cilën thotë se shihen forcat serbe duke lëvizur në afërsi të kufirit me Kosovën.

Kurti një lëvizje të tillë e ka ndërlidhur edhe më kërcënimin që Aleksander Vucic e ka bërë para pak ditësh, i cili s’ka përjashtuar mundësinë se Serbia do të provojë të kthehet në Kosovë në momentin kur do t’i jepet rasti.