Juventusi ka marrë një fitore të rëndësishme në javën e 34-t të Serie A, duke mposhtur Monzën me rezultat të pastër 2:0 në “Allianz Stadium”, duke konsoliduar pozitën në zonën e Ligës së Kampionëve.

Ndeshja nisi fuqishëm për bardhezinjtë, të cilët kaluan në epërsi që në minutën e 11-të. Ishte qendërmbrojtësi González që shfrytëzoi një goditje këndi për të tundur rrjetën e Monzës, duke e vënë Juventusin në avantazh të hershëm. Bardhezinjtë nuk ndalën së sulmuari dhe në minutën e 33-të dyfishuan epërsinë përmes Randal Kolo Muanit, i cili finalizoi një aksion të bukur kolektiv me një goditje precize.

Në fundin e pjesës së parë, Juventusit i ndërlikoi punët kartoni i kuq i marrë nga Yildiz në minutën e 45+3-të, pasi ndërhyri ashpër ndaj një kundërshtari. Pavarësisht se luajtën gjithë pjesën e dytë me një lojtar më pak, juventinët ruajtën epërsinë me një organizim solid në mbrojtje dhe administruan lojën pa shumë rreziqe.

Me këtë fitore, Juventus ngjitet në kuotën e 62 pikëve dhe forcon vendin e katërt, duke qenë gjithnjë e më pranë sigurimit të një vendi në Ligën e Kampionëve për sezonin e ardhshëm. Nga ana tjetër, Monza, që tashmë renditet në vendin e fundit me vetëm 15 pikë, ndodhet 11 pikë larg zonës së mbijetesës, duke e bërë misionin e qëndrimit në elitë thuajse të pamundur.