62-vjeçarja e mban këtë post që nga maji i vitit 2022.

“Presidenti francez, Emmanuel Macron, pranoi të hënën dorëheqjen e kryeministres, Elisabeth Borne”, tha zyra e presidentit.

Dorëheqja e Borne-s pason tensionet e fundit politike mbi legjislacionin e diskutueshëm të imigracionit të mbështetur nga Macron për të forcuar aftësinë e qeverisë për të dëbuar disa të huaj, ndër masa të tjera.

Borne ishte emëruar në maj të 2022-s pas rizgjedhjes së Macron për një mandat të dytë.

Ajo ishte kryeministrja e dytë femër e Francës.

Deklarata nga zyra e Macron tha se Borne do të vazhdojë të trajtojë çështjet e përditshme të brendshme derisa të emërohet një qeveri e re.

Pritej gjerësisht që Macron të riorganizonte ekipin e tij kryesor pas pengesave legjislative dhe t’i jepte një shtysë të re presidencës së tij përpara Lojërave Olimpike të Parisit që do të mbaheshin më vonë këtë verë.

Spekulimet për një riorganizim të qeverisë kishin qenë të përhapura në javët që kur miratimi i ngushtë në parlament i rregullave të ashpra të imigracionit ekspozoi çarje të thella në shumicën centriste të Macron.

Ndër ata që citohen si kandidatë potencialë për të zëvendësuar Borne janë ministri i arsimit, Gabriel Attal, 34 vjeç dhe ministri i mbrojtjes, Sébastien Lecornu, 37 vjeç.

Të dy do të ishin kryeministri më i ri i Francës.

Ekspertët kanë përmendur gjithashtu ministrin e financave, Bruno Le Maire dhe ish-ministrin e bujqësisë, Julien Denormandie, si opsione të mundshme.