Kryeministri japonez Fumio Kishida ka njoftuar planet për të trajtuar COVID-19 në ekuivalentin e një gripi sezonal që në fillim të kësaj pranvere.
Në këtë mënyrë do të lehtësonte më tej rregullin e mbajtjes së maskave dhe masave të tjera parandaluese, ndërkohë që vendi përpiqet të kthehet në normalitet.
Kishida ka thënë se kishte udhëzuar ekspertë dhe zyrtarë qeveritarë të diskutojnë detajet e uljes së statusit të COVID-19.
“Për t’iu rikthyer përditshmërisë sonë normale, po zbatojmë masat për t’iu përshtatur jetës me COVID-19. Do të studiojmë masa konkrete për të kaluar gradualisht në hapin tjetër”, ka thënë Kishida.
Në Japoni, COVID-19 aktualisht kategorizohet si sëmundje e klasit 2, së bashku me SARS-in dhe tuberkulozin, dhe i nënshtrohet kufizimeve në lëvizjen e pacientëve dhe kontakteve të tyre të ngushta, ndërsa autoritetet qendrore dhe lokale lejohen të lëshojnë masa urgjente.
Ndryshimi i planifikuar do të shënonte një pikë kthese të madhe në politikën e Japonisë për COVID-19 drejt normalizimit të aktiviteteve sociale dhe ekonomike.
