Izraeli nisi sulmet në Libanin jugor sot herët në mëngjes, teksa vazhdonte të godiste objektivat në Rripin e Gazës, tha ushtria izraelite.

Sulmet erdhën pasi militantët nga Libani qëlluan rreth tre duzina raketa mbi Izraelin të enjten.

Për më tepër, raketat u hodhën nga Gaza në drejtim të Izraelit jugor të premten herët në mëngjes, pas sulmeve izraelite atje.

Përleshjet janë përshkallëzuar këtë javë, pas bastisjeve të policisë izraelite në kompleksin e xhamisë Al-Aksa në Jerusalem.

Me muajin e shenjtë të Ramazanit dhe festën njëjavore hebraike të Pashkës që përkon sërish këtë vit, sulmet ndërkufitare kanë ardhur në një kohë delikate.

Kompleksi i xhamisë, i cili është vendi i tretë më i shenjtë në Islam, është ndërtuar në vendin më të shenjtë në Judaizëm, Malin e Tempullit.

Dy vjet më parë, pretendimet mbi një operacion të policisë izraelite në Al-Aksa çuan në 11 ditë konflikt të hapur midis Izraelit dhe militantëve palestinezë në Gaza.

Ushtria izraelite të premten tha se sulmet kishin në shënjestër instalimet që i përkisnin grupit militant Hamas në jug të Libanit. Mediat lokale raportuan shpërthime në qytetin port libanez të Tirit.

SHBA-ja, BE-ja, Japonia dhe disa vende të tjera e kanë klasifikuar Hamasin si një organizatë terroriste, raporton DW, transmeton Klankosova.tv.

Kryeministri i Libanit Najib Mikati tha se vendi i tij “refuzon kategorikisht çdo përshkallëzim ushtarak”.

Shpërthimi i fundit i raketave midis territorit libanez dhe Izraelit është një nga përshkallëzimet më të mëdha të dhunës përgjatë kufirit që kur forcat izraelite dhe forcat paraushtarake aleate me organizatën me bazë në Liban, Hezbollah, luftuan për 34 ditë më 2006.