Ish-presidenti brazilian Luiz Inacio Lula da Silva tha se presidenti ukrainas Volodymyr Zelensky ishte “njëlloj përgjegjës” për luftën në vendin e tij si presidenti rus Vladimir Putin.

Da Silva në një intervistë për revistën amerikane Time të mërkurën, tha po ashtu se as Uashingtoni dhe as OKB-ja nuk u kursyen.

“Unë shoh të gjithë parlamentet (të botës) duke duartrokitur presidentin ukrainas. Por ky djalë është po aq përgjegjës sa Putini. Nuk ka kurrë vetëm një fajtor për luftën,” tha Lula, një favorit në zgjedhjet presidenciale të tetorit në Brazil, transmeton Demokracia.com.

“Ai donte një luftë. Nëse nuk donte një të tillë, do të kishte negociuar pak më shumë,” shtoi ai.

Lula tha gjithashtu se Zelensky po sillej “çuditërisht”. “Do të thuhej sikur të ishte në një shfaqje. Ai është në televizion në mëngjes, në mesditë dhe në mbrëmje, në parlamentin anglez, francez, gjerman, sikur të ishte në një fushatë. Duhet të kujdeset më shumë për tryezën e bisedimeve”.

Ikona e së majtës braziliane ka akuzuar gjithashtu fuqitë perëndimore për “nxitje të urrejtjes ndaj Putinit”.

“Nëse Zelensky inkurajohet, ai mendon se është më i miri. Në fakt, duhet t’i thuash seriozisht: “Djalë, ti je një komedian i mirë, por ne nuk do të shkojmë në luftë që të mund të performosh”. Dhe për t’i thënë Putinit: “Ti ke shumë armë, por nuk duhet t’i përdorësh kundër Ukrainës. Le të flasim!”

Lula, 76 vjeç, i cili shërbeu si president i Brazilit për dy mandate nga 2003 deri në 2010, akuzoi presidentin amerikan Joe Biden për “dështim për të marrë vendimin e duhur” kur ishte fjala për konfliktin në Ukrainë.

“Shtetet e Bashkuara kanë një peshë shumë të madhe dhe mund të kishin shmangur konfliktin… Biden mund të ishte përfshirë më shumë, ai mund të kishte fluturuar në Moskë dhe të bisedonte me Putinin. Ky është pozicioni që pritet nga lideri”, tha ai.

Ai kritikoi gjithashtu OKB-në. “Ka një nevojë urgjente për të krijuar një qeveri të re botërore. OKB-ja nuk përfaqëson më asgjë, liderët botërorë nuk e marrin më seriozisht. Putini pushtoi në mënyrë të njëanshme Ukrainën pa u konsultuar me OKB-në”, tha ai. /Demokracia.com/