Kosova ka ndërruar gjashtë presidentë deri më tash. Në krye të vendit në periudha të ndryshme kanë qenë: Ibrahim Rugova, Fatmir Sejdiu, Behgjet Pacolli, Atifete Jahjaga, Hashim Thaçi dhe presidentja aktuale, Vjosa Osmani.
Vjosa Osmani, që aktualisht është presidente e Kosovës, ka vendosur që të “mendojë” pak edhe për paraardhësit e saj, që janë gjallë ende dhe jetojnë në Kosovë.
Presidenca ka dhënë një tender për sigurimin shëndetësore të ish-presidentëve. Ky tender ka vlerën e mbi 7 mijë eurove.
“Shërbime të sigurimeve shëndetësore për ish-Presidentët dhe sigurime shëndetësore në udhëtim. Vlera e përgjithshme e kontratës 7 mijë e 560,00”, thuhet në njoftimin e shpallur në KRPP.
Siç është cekur në tender, shërbimet e sigurimeve shëndetësore për ish-presidentët do të jenë për një vit.
“Sigurimi në udhëtim për 1 vit me afat të mbulueshmërisë 30 ditë. Sigurimi në udhëtim për 1 vit me afat të mbulueshmërisë 90 ditë”, thuhet në tender.
Në tenderin që është shpallur në KRPP nuk është treguar shumë se çfarë sigurime do të marrin ish-presidentët, vetëm se këtë tender e ka fituar kompania “SIGAL UNIQA GROUP AUSTRIA”.
Kontrata mes tyre dhe Presidencës është nënshkruar ditën e sotme, 21.06.2022. /Demokracia.com/