Shefi i shtabit të forcave të mbrojtjes izraelite, gjenerallejtënant Herzi Halevi miratoi planet përfundimtare të hënën për veprime ushtarake në Rafah të Gazës jugore, së bashku me kampet e refugjatëve në qendër të Rripit.

Kështu njofton faqja e lajmeve Ynet, ku thekson se tanket izraelite janë rreshtuar në kufirin e Gazës dhe gati për dritën jeshile për të filluar ofensivën e diskutueshme, e konsideruar nga Izraeli si shtytja e fundit e nevojshme për të çrrënjosur forcat luftarake të Hamasit nga Rripi, pavarësisht paralajmërimeve për një fatkeqësi humanitare nëse civilët nuk largohen nga rreziku.

Planet taktike për të hyrë në thellësi të luftimeve u përfunduan gjatë ditëve të fundit, raporton Ynet.

Ato përfshijnë një pushtim me faza që mund të ndalet ose vonohet në rast të përparimit në bisedimet e pengjeve.

Raporti pretendon se në 48 deri në 72 orët e ardhshme do të shihet ose një marrëveshje pengjesh ose fillimi i pushtimit.

Ndërkohë, presidenti amerikan Joe Biden u kërkoi të hënën udhëheqësve të Egjiptit dhe Katarit që të “ushtrojnë të gjitha përpjekjet” për të siguruar lirimin e pengjeve të mbajtura nga Hamasi si pjesë e negociatave për një armëpushim në Gaza, tha Shtëpia e Bardhë.

Washingtoni, Doha dhe Kajro kanë ndërmjetësuar prej muajsh për të arritur një armëpushim në territorin palestinez, i cili ka duruar bombardimet e pamëshirshme nga Izraeli në përgjigje të sulmit të pashembullt vdekjeprurës nga Hamasi kundër Izraelit më 7 tetor.

Përfaqësuesit nga Egjipti, Katari dhe Hamasi u takuan të hënën në Kajro, me grupin islamik palestinez që pritet t’i përgjigjet një propozimi për një armëpushim të dytë në Gaza, së bashku me lirimin e ri të pengjeve.

Në deklarata pothuajse identike, Shtëpia e Bardhë tha se Biden foli me presidentin egjiptian Abdel Fattah al-Sisi dhe emirin e Katarit Sheikh Tamim bin Hamad Al-Thani në telefonata të veçanta dhe diskutoi “marrëveshjen tani në tryezë”.

Biden u kërkoi liderëve “të bëjnë të gjitha përpjekjet për të siguruar lirimin e pengjeve të mbajtura nga Hamasi pasi kjo tani është e vetmja pengesë për një armëpushim të menjëhershëm dhe lehtësim për popullin e Gazës”, tha Shtëpia e Bardhë.

Një burim i afërt me Hamasin i tha AFP se delegacioni i grupit ishte i prirur t’i përgjigjej “sa më shpejt të jetë e mundur” propozimit.

Sekretari amerikan i Shtetit, Antony Blinken, duke vizituar Riadin, tha se shpresonte se Hamasi do ta pranonte ofertën, të cilën ai e karakterizoi si “jashtëzakonisht bujare nga ana e Izraelit”.

Marrëveshja do të përfshijë një “armëpushim të qëndrueshëm 40-ditor” së bashku me lirimin potencial të mijëra të burgosurve palestinezë, në këmbim të kthimit të pengjeve të mbajtura nga Hamasi, tha kryediplomati britanik David Cameron në kryeqytetin saudit.

Që nga fillimi i luftës, në fund të nëntorit u shpall një armëpushim i vetëm njëjavor.