Megjithatë, Lajçak nuk pritet të takohet me Gërvallën në Prishtinë, por me kryeministrin e Kosovës, Albin Kurtin dhe kryenegociatorin dhe zëvendëskryeministrin Besnik Bislimin.

“Kryeministri i Republikës së Kosovës, Albin Kurti, pret në takim përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajçak”, thuhet në njoftim për media të Qeverisë.

Lajçak vjen në Kosovë pas vizitës njëditore që e zhvilloi në Serbi, ku u takua me presidentin serb Aleksandër Vuçiç dhe kryenegociatorin Petar Petkoviç, me të cilët tha se ka diskutuar për “perspektivën strategjike” dhe “hapat e ardhshëm” në procesin e dialogut për normalizimin e marrëdhënieve Prishtinë-Beograd.

“Me të mbërritur në Beograd sot në mëngjes, u takova me Vuçiçin. Në diskutimin tonë, u fokusuam në perspektivën strategjike për vitin 2024, bëmë një bilanc mbi gjendjen e lojës në dialog dhe folëm për hapat e ardhshëm në normalizimin e marrëdhënieve me Kosovën”, shkroi diplomati sllovak në platformën X të hënën.

Ndërkaq, presidenti i Serbisë njoftoi nëpërmjet një postimi në Facebook se nga Lajçaku kërkoi mbështetje për ndaljen e “provokimeve” të Kosovës, ndërsa gjithashtu insistoi në “domosdoshmërinë” e themelimit të shpejtë të Asociacionit të Komunave me Shumicë Serbe në Kosovë.

“Pata një takim konstruktiv dhe shumë korrekt. Unë theksova domosdoshmërinë e formimit të Asociacionit të Komunave me Shumicë Serbe, për mbajtjen sa më të shpejtë të zgjedhjeve lokale në veri të Kosovës dhe kërkova mbështetjen e BE-së për ndalimin e provokimeve të mëtejshme që vijnë nga Prishtina”, deklaroi presidenti serb pas takimit me Laçakun.

Ai pretendoi ndër të tjera se Serbia është e gatshme për t’i përmbushur të gjitha detyrimet që rrjedhin nga procesi i dialogut për normalizimin e marrëdhënieve, mirëpo “në përputhje me marrëveshjet juridike ndërkombëtare” dhe “duke respektuar Kushtetutën e Serbisë dhe Kartën e OKB-së”, ndonëse Serbia është shprehur edhe me shkrim kundër zbatimit.

Lajçaku vjen në Beograd dhe Prishtinë në kuadër të përpjekjeve për të përcaktuar shpejtësinë e dakordimit për modalitetet e zbatimit të Marrëveshjes Bazë (Bruksel, 27 shkurt) dhe Aneksit të Implementimit (Ohër, 18 mars) për normalizimin e marrëdhënieve Kosovë-Serbi.

Kryeministri Kurti dhe presidenti Vuçiç u takuan për herë të fundit në shtatorin e vitit të kaluar në Bruksel, ndërsa në tetor u takuan veç e veç me krerët e shteteve kryesore evropiane pas “stuhisë diplomatike” të emisarëve të Gjermanisë, Francës dhe Italisë, në përpjekje për t’i shtyrë Kosovën dhe Serbinë drejt zbatimit të marrëveshjeve dhe zbutjen e tensioneve.