Kryetari i Partisë Demokratike të Kosovës, Enver Hoxhaj, ka pritur në takim ambasadorin e Bashkimit Europian në Kosovë, Tomas Szunyog.

Gjatë këtij takimi është diskutuar për situatën aktuale politike në Kosovë, për proceset e rëndësishme që e presin vendin në vijim, zhvillimin e  dialogut Kosovë – Serbi dhe bashkëpunimin rajonal, thuhet nga zyra për komunikim e PDK-së, përcjell Demokracia.com

Sipas këtij njoftimi, Hoxhaj ka theksuar nevojën për konstituimin  e Kuvendit dhe formimin e menjëhershëm të qeverisë pas certifikimit të rezultateve, sepse qytetarët kanë nevojë për dorën e shtetit. Ai ka bërë të ditur që PDK-ja do të vazhdojë të jetë opozitë konstruktive.

“Rezultatet e dala nga zgjedhjet e 14 shkurtit  dhe pjekuria politike e partive tregon që Kosova ka demokraci të konsoliduar dhe të fortë, karshi vendeve të rajonit”, ka thënë Hoxhaj.

Ndërkaq, ambasadori i BE-së në Kosovë, Tomas Szunyog ka inkurajuar PDK-në për të qenë opozitë konstruktive e pushtetit, gjë që për të cilën ka nevojë Kosova./Demokracia.com