Ethet e futbollit kosovar rikthehet nesër me dy superndeshje që luhen në kuadër të Kupës së Kosovës, shkruan Demokracia.com.
Prishtina në stadiumin “Fadil Vokrri” në kryeqytet e pret Dritën dy kandidatë këta kryesorë për të fituar këtë trofe, por ja që njëra duhet të ndalet qysh në 1/8 e finales së Kupës.
Sfidë shumë joshëse dhe e nxehtë pritet të jetë edhe në Podujevë ku ndeshen Llapi e Ballkani. Ish futbollisti i njohur tash trajner Erdin Hashani, në një bisedë për Demokracia.com ka parashikuar këto dy ndeshje, i cili pret duel shumë të fortë dhe të paqartë deri në fund.
“Sa i përket ndeshjes Prishtina – Drita, është shumë e vështirë, sepse janë dy skuadra që kanë qenë më në formë në xhirot e fundit dhe është një përballje shumë interesante. Nëse bazohemi në ndeshjen e Superkupës, atëherë Prishtina ka përparësi dhe nëse Drita nuk ka mësuar nga kjo humbje, atëherë i kisha jep përparësi Prishtinës, edhe pse tek kjo ndeshje është shumë e vështirë me u përcaktua sepse e thash është duel i dy skuadrave më në formë në xhirot e fundit”, ka vlerësuar Hashani.
Një ndeshje tejet joshëse pritet të jetë në “Zahir Pajaziti”, ku Llapi e pret Ballkanin. Llapjanët, gjasat e vetme për të dalë në Europë i ka përmes Kupës së Kosovës dhe nëse dështon nesër, vazhdimin e garave do ta ketë shumë të vështirë.
Sa i përket ndeshjes Llapi – Ballkani, duhet me pa ndryshimet që i ka bërë Ballkani a janë vërtet të duhura në shtabin teknik apo jo. Shkëmbin e pret një test i vërtetë sepse Ballkani e ka synim dhe Kupën e Kosovës dhe titullin kampion. Nëse eliminohet, atëherë unë mendoj që është një dështim për ta. Ndërsa Llapi, mendoj që e ka të vetmen mundësi që përmes Kupës të dalë në Europë, sepse me pikë është shumë mbrapa që ta kap Europën. Duke e parë që Llapi si vendas luan mirë dhe nuk ka zgjidhje tjetër për garat ndërkombëtare këtu i kisha jep përparësi Llapit që do të kualifikohet tutje”, ka përfunduar Erdin Hashani. /Demokracia.com