Deputeti i LVV-së Haxhi Avdyli dhe kryetari i AAK-së, Ramush Haradinaj, janë përplasur për temën e dialogut gjatë një debati të premten në Parlament.

Avdyli e ka akuzuar Haradinajn se s’mund të kërkojë përgjegjësi për dialog, e kjo e ka nxitur Haradinajn të marrë fjalën për t’i thënë Avdylit se s’ka fare respekt për të.

Por, nuk ka përfunduar këtu. Kryetari i AAK-së duke polemizuar, e ka përsëritur një episod që ka pasur në Stadiumin e Prishtinës në vitin 2005, kur kishte thënë “mshelne komandanta të Bllacës” dhe pastaj kishte sharë më nënë, teksa iu kishte përgjigjur fishkëllimave të një pjese të masës.

“Nëse kaloni në rrafshe tjera, njëherë kam qenë në Stadium këtu në Prishtinë, iu kam çu të fala shumëve, qashtu ju koftë tanve”, tha të premten në Parlament Haradinaj, shkruan Express.

Avdyli tha se Haradinaj ka formuar grupe për dialog që s’kanë pasur legjitimitet politik dhe tash s’mund të kërkojë përgjejgësi politike për ata që kanë legjitimitet dhe vota të qytetarëve.

“ Ai e ka dorëzuar dialogun te kryetari i Prishtinës dhe Fatmir Limaj”, kishte thënë Avdyli.