Kandidati i Partisë Demokratike të Kosovës (PDK) për kryeministër në zgjedhjet e 9 shkurtit, Bedri Hamza, ka deklaruar se PDK është e gatshme për një takim gjithëpërfshirës – të thirrur nga presidentja – për zgjidhjen e bllokadës politike aktuale.
Pas një mbledhjeje të zhvilluar në selinë e PDK-së, Hamza iu përgjigj shkurtimisht pyetjes së gazetarëve, duke theksuar se PDK e ka kërkuar këtë takim nga Presidentja e Republikës së Kosovës.
“Komunikata e përmbledh krejt qëndrimet e kryesisë së PDK-së dhe shpjegon më së mire ato se çka PDK për çka qëndron edhe çka kërkon. Mbi të gjitha ne jemi të interesuar që të mos kemi vakum institucional, vendi të ketë institucione edhe normalisht që të trajtohen prioritete edhe temat të cilat i ka vendi”, ka thënë Hamza.
Ai ka treguar po ashtu se e kane kërkuar takimin gjithpërfshirës te Presidentja.
‘Po jemi të gatshëm dhe e kemi kërkuar këtë nga Presidentja” .
Në një komunikatë të lëshuar nga PDK, partia ka theksuar se roli i presidentes është kyç për zhbllokimin e situatës politike dhe institucionalizimin e vendit.
Kuvendi dështoi për të dymbëdhjetën herë në zgjedhjen e kryetarit të ri të institucionit, PDK i bëri thirrje koalicionit VV – GUXO – Alternativa që “të mos abuzojë edhe më tej me të drejtën kushtetuese për propozimin e kandidatit për Kryetar të Kuvendit, por, të pranojë realitetin politik dhe të reflektojë për të mos e mbajtur peng edhe më tutje shtetin për interesa të ngushta partiake.”
