Njohësi i rrethanave politike, Afrim Haliti, ka reaguar pas fotografisë së kryeministrit të Kosovës, Albin Kurtit, që shfaqet i buzëqeshur në karrocën e personave me nevoja të veçanta.

Haliti, me anë të një postimi në ‘Facebook’ ka thënë se përvetësimi i eksperiencave të personave me nevoja të veçanta “nuk është lojë” duke thënë se kjo gjë i margjinalizon më tej ata.

“Përvetësimi i eksperiencave të personave me aftësi të kufizuara nuk është lojë dhe është i gabuar sepse përfshin huazimin ose marrjen e elementeve të identitetit ose përvojës së aftësisë së kufizuar pa mirëkuptimin, respektin ose pëlqimin e duhur.  Kjo shpie në shtrembërimin e përvojave dhe realiteteve të personave me aftësi të kufizuara dhe përjetëson stereotipe dhe stigma të dëmshme”, ka shkruar ai.

“Personat me aftësi të kufizuara kanë një histori unike që shpesh anashkalohet dhe nënvlerësohet nga shoqëria e gjërë.  Duke përvetësuar eksperiencën e personave me aftësi të kufizuara, personat që nuk kanë aftësi të kufizuara margjinalizojnë edhe më tej këta persona si dhe përvojat e tyre”, thuhet më tej në postimin e tij.

“Për më tepër, përvetësimi i identitetit ose përvojës së aftësisë së kufizuar rezulton gjithashtu në komodifikimin e aftësisë së kufizuar, ku përvojat e personave me aftësi të kufizuara përdoren për përfitime pa pëlqimin ose përfitimin e tyre”. /Demokracia.com/