Për zvarritjen e rastit të Naser Kelmendit emër ky i cili është i njohur në mbarë botën, aq sa u bë problem i rëndësishëm edhe për Shtetet e Bashkuara të Amerikës, gjykatësja Suzana Qerkini ka thënë se njëra ndër arsyet që ka dërguar në zvarritjen e këtij rasti “është edhe avancimi i saj në Departamentin Special” .

Kjo pasi ajo dhe anëtarja e trupit gjykues, Violeta Namani më 1 janar 2021, ishin përzgjedhur si gjykatëse në këtë departament, ndërsa lënda kishte mbetur në Departamentin për Krime të Rënda.

“Lënda ka mbetur në DKR, prandaj ka ardhur kjo zvarritje, por sërish është kthyer te ne dhe ja ku jemi”, ka thënë ajo.

Ndërsa për avokatin Besnik Berisha dhe klientit të tij, zvarritjet në këtë lëndë janë të pafalshme.
Madje ai konsideron se kjo zvarritje ka ardhur për shkak se Gjykata nuk ka pasur guximin që të marrë një aktgjykim lirues për shkak të presionit publik të krijuar rreth profilit të Naser Kelmendit si “bos i drogës” në Ballkan.

Kështu duke shpallur një aktgjykim dënues që me përllogaritje, është afërsisht koha e kaluar në paraburgim.

“Gjykata në pamundësi për të ardhur deri tek një verdikt lirues, e ka përdorë zvarritjen si mjet neutralizues, pra që ta neutralizojë opinionin që Naser Kelmendi është akoma ne gjykim, pritet një ditë vendimi, dhe në fund u shpall vendimi që cent më cent e llogariti ditët e qëndrimit në paraburgim, pa çka se nuk ka as edhe një provë të vetme”, është shprehur Berisha.

Nga gjetjet e monitorimit ka rezultuar se në procesin e rigjykimit 6 seanca kishin dështuar në këtë rast.

“Zvarritja në rigjykim është e pafalshme, sepse përderisa shkruhej për narko-dillerin ndërkombëtar dhe unë çoja linçe në gjykatë dhe kërkoja që të nisej po flasim për 5 vite, më 2018 është marrë vendimi në Apel, në 2023 jemi ende nuk ka vendim, është më shumë zgjatur rigjykimi nga liria për një pikë të aktakuzës, sesa gjykimi në paraburgim me tetë pika tjera të aktakuzës me dëshmitarë nga e gjithë bota”.

“Mos të harrojmë se ky rigjykim është karakterizuar me zero prova të reja, është karakterizuar me zero dëshmitarë të dëgjuar përballë gjykatës”, ka thënë Berisha, raporton “Betimi për Drejtësi”.

Rasti i Kelmendit në seancën e parë të 26 janarit 2022 kishte kaluar në Departamentin Special.

Historia e Naser Kelmendit me gjykatat në Kosovë

Gjykata Themelore në Prishtinë, më 1 shkurt 2018, kishte shpallur aktgjykimin ndaj të akuzuarit Naser Kelmendi, i cili akuzohej për disa vepra penale. Kelmendi ishte dënuar me gjashtë vjet burgim, vetëm për pikën 8 të aktakuzës, pasi ishte shpallur fajtor për trafikim me narkotikë.

Ndërsa, ishte shpallur i pafajshëm për veprat tjera penale që lidhen me vrasjen e Ramiz Delaliqit, për krim të organizuar si dhe për pikat tjera të aktakuzës, që lidhen me shitjen dhe prodhimin e substancave narkotike.

Në arsyetimin e këtij aktgjykimi, kryetarja e trupit gjykues, Anna Adamska Galant, kishte thënë se gjykata kishte vendosur ta lirojë nga këto pika, pasi nuk është provuar se Naser Kelmendi ka kryer këto vepra penale. Sipas saj, gjykata kishte vlerësuar se nuk kishte prova për të mbështetur akuzën për vrasje.

Në dënimin e shqiptuar, atij i ishte llogaritur edhe koha e kaluar në paraburgim, ndërsa ishte obliguar që t’i paguajë shpenzimet procedurale pjesërisht në vlerë prej 5 mijë euro. Gjykata kishte vendosur ta caktojë edhe masën e paraburgimit ndaj tashmë të dënuarit Kelmendi, pasi sipas saj, dënimi është mbi pesë vjet.

Por, Gjykata e Apelit e kishte anuluar aktgjykimin e shkallës së parë dhe rastin e kishte kthyer në rigjykim,

Prokuroria kishte ngritur aktakuzë në korrik të vitit 2014, kundër Naser Kelmendit, të cilin e ngarkonte me 9 pika të aktakuzës.

Kelmendi, i cili është gjykuar nga një trup gjykues me shumicë të gjyqtarëve të EULEX-it, ishte arrestuar në maj të vitit 2013, ndërsa nga ajo kohë kishte qëndruar në paraburgim deri më 28 shkurt 2017, kur iu zëvendësua kjo masë me atë të arrestit shtëpiak.

Më pas, Gjykata e Apelit e kishte kthyer prapë në paraburgim, ndërsa më 17 mars 2017, ishte liruar nga paraburgimi përsëri nga Gjykata Themelore në Prishtinë. Ndaj këtij vendimi ishte ankuar prokurori, ndërsa Gjykata e Apelit e kishte miratuar ankesën e tij duke e kthyer në paraburgim prapë të akuzuarin Kelmendi.

Më vonë, Kelmendi, në qershor të vitit 2017, prapë është liruar nga paraburgimi për t’u mbrojtur në liri, gjë që e bën edhe tani pasi që ndaj tij, nuk ka të caktuar ndonjë masë për sigurimin e prezencës së tij në gjykatë, pasi që u është përgjigjur rregullisht ftesave të gjykatës.

Prokuroria Speciale, Naser Kelmendin e ka ngarkuar me veprat penale: krim i organizuar, vrasje e rëndë, blerje, posedim, shpërndarje dhe shitje e paautorizuar e narkotikëve të rrezikshëm dhe substancave psikotropike dhe prodhim e përpunim i paautorizuar i narkotikëve të rrezikshëm dhe substancave psikotropike, të përmbledhura në 9 pika të aktakuzës.

Prokuroria pretendonte se Kelmendi në bashkëkryerje me Fahrudin Radonçiqin, Ekrem Lekiqin, Muhamed Ali Gashin, Milovan Jeremiqin, Lubisha Buhan “Çume”, Milan Ostojiqin, “Sandokanin”, Naser Oriqin, Senad Sahinpasiqin, Nebojsha Vukomanoviqin, Raseta Stranjan, Benjamin Halimoviqin, Edin Ahmetshahiqin dhe të tjerë, ka organizuar, formuar, mbikëqyrur, udhëhequr dhe apo drejtuar grupin kriminal të organizuar dhe të strukturuar, apo ka marrë pjesë aktivisht në këtë grup të organizuar kriminal që kanë kontribuar në kryerjen e krimeve të rënda, e që veçohet vrasja e “kryegangsterit rival” Ramiz Delaliq- “Çelo”, në vitin 2007.

Për vrasjen e Delaliqit, sipas prokurorisë, Naser Kelmendi, në vitin 2006, ka bërë një sërë takimesh në Sarajevë, me Fahredin Radonçiqin, Ekrem Lekiqin, Muhamed Ali Gashin, Senad Sahipasiqin, Naser Oriqin dhe me të tjerë, për të planifikuar dhe për të bërë komplotin dhe për të vrarë, Ramiz Delaliq.

Prokuroria pretendonte se si rezultat i këtyre takimeve të organizuara, Naser Kelmendi është ofruar dhe ka pranuar përgjegjësi për të identifikuar dhe punësuar varësit që do të kryenin vrasjen e Ramiz Delaliqit, për kryerjen e kësaj vrasje prokuroria ka thënë se Kelmendi ka angazhuar me pagesë Strahinja Raseta dhe Nebojsha Vukomanoviq nga Serbia, për të vrarë Ramiz Delaliqin, më 27 qershor 2007 në Sarajevë rreth orës 23:30.

Tutje, sipas aktakuzës, së paku nga viti 2000 deri më 2012, Naser Kelmendi si kreu dhe drejtuesi i grupit të gjerë kriminal të strukturuar dhe të organizuar, ka menaxhuar dhe drejtuar blerjen, përgatitjen, transportin, shitjen dhe shpërndarjen e një sasie të madhe heroine, ekstazie, spind dhe droga të tjera, nëpërmjet një rrjeti të organizuar kriminal të themeluar mirë, që përfshinte dëshmitarin K1- përgjegjës për menaxhimin dhe përzierjen e narkotikëve për Naser Kelmendin, K2, i cili ka udhëhequr dërgesat ndërmjet Turqisë, rajonit të Ballkanit dhe Holandës, K3-shpërndarës i drogës në Beograd, Liridon Kelmendin, menaxher i shpërndarjes së drogës për në Serbi dhe për në vendet tjera evropiane, Mehanoviq Haris – vozitës dhe truprojë, Sead Akeliq – vozitës, Zelko Boziq – automekanik, i cili krijonte hapësira të fshehta në automjete për drogat, Hakija Kreliq që mbante kontakte në Turqi, Ilir Kastrati – që mbante kontakte në Turqi, Asmir Kalac – koordinator i dërgesave të drogës, dhe të tjerë.

Prokuroria pretendonte se përmes rrugëve të koordinuara mirë për trafikimin e narkotikëve, dërgesave të mëdha me ekstazi janë marrë nga Holanda dhe janë transportuar për në Bosnjë- Hercegovinë dhe Kosovë, ku janë ripaketuar dhe transportuar më tej për në Stamboll dhe Droga e marrë në Stamboll u transportua përsëri përmes Bosnjës dhe Hercegovinës dhe Kosovës dhe më pas u dërgua dhe iu shit tregtarëve dhe shpërndarësve në të gjithë Evropën.

Naser Kelmendi akuzohej se në bashkëkryerje me Kl, K2, K3, Liridon Kelmendi, Haris Mehanovic, Sead Akeljic, Zeljko Bozic, Hakija Krlic, Iljier Kastrati, Asm_jr Kalac dhe të tjerët pa autorizim, kanë kultivuar, prodhuar, përpunuan ose përgatitën substanca, të deklaruara si droga të rrezikshme narkotike me qëllim të shitjes, shpërndarjes ose ofrimit të tyre për shitje.

Kush është Naser Kelmendi?

Biznesmeni nga Peja, Naser Kelmendi, bashkë me djemtë e tij, i trazonte organet e drejtësisë në rajon e më gjerë. Ai ka kohë që e ka shndërruar familjen e tij në një grup kriminal, të njohur kryesisht për trafikim të drogës e krim të organizuar.

Vite kohë kishin shpenzuar autoritetet boshnjake duke e hetuar Naser Kelmendin dhe e njohin mirë atë dhe grupin e tij. Autoritetet boshnjake ia kishin arrestuar djalin, Elvis Kelmendin.

Ai dhe disa të tjerë u prangosën në Sarajevë për krim të organizuar, lidhur me kontrabandën ndërkombëtare dhe trafikimin e sasive të mëdha të drogës, si dhe për vepra të tjera penale.

Autoritetet boshnjake kishin shkuar deri në Francë për të kërkuar ndihmë për t’u përballur me rrjetin kriminal të Naser Kelmendit. Agjencia Shtetërore e Bosnjës për Mbrojtje dhe Hetime (SIPA) në vitin 2008 kishte bërë një prezantim në Interpol, në Lyon, duke përshkruar aktivitetet e Kelmendit dhe grupit të tij.

Anëtarët e familjes Kelmendi janë përfshirë thellë në trafikun e drogës, deri në kartelet kriminale të Meksikës në Amerikën Latine.

Naser Kelmendi shkoi nga Kosova në Sarajevë pas përfundimit të luftës në Bosnjë. Autoritetet boshnjake e kishin përpara një luftë tjetër dhe targeti ishte bërë shqiptari nga Peja, që, siç tregojnë të dhënat, u bë shtetas i Bosnjës që në vitin 1998.

Kur ishte 19 vjeç, në vitin 1976, u dënua me një vit e gjysmë burgim për tentim-vrasje.

Hetuesit boshnjakë e përshkruajnë si perandori kriminale ballkanike atë që e posedon sot 64-vjeçari. Kelmendi, djemtë e tij dhe vëllai, Beqiri, drejtojnë një numër firmash në Bosnjë, Serbi e Kosovë. Dosja për ta në SIPA-n e Bosnjës është tepër e trashë.

Kelmendi, 10 vjet më parë e kishte përshkruar veten kështu: “I dua veturat. I dua femrat”.

“Jam 54 vjeçar e droga nuk më ka interesuar kurrë. Jam thjesht një biznesmen”, pati thënë për Vijest-in malazez.

Por policia e Bosnjës thoshte se kolegët e tyre në mbarë Evropën e dinë historinë e Naser Kelmendit dhe grupit të tij.

Në listën e zezë të SHBA-së

Shtetet e Bashkuara të Amerikës e futën Naser Kelmendin dhe familjen e tij në listën e zezë në qershor të vitit 2012, me vendim të presidentit të atëhershëm amerikan, Barack Obama.

Shkaku ishte se drejtonte një rrjet familjar që shpërndante heroinë dhe droga të tjera përmes Afganistanit në Turqi dhe Europë.

Krahas liderit të kartelës meksikane të drogës, Hoze Antonio Sota Gastemula, dhe atij të tregtarit afgan, Sajed Vazir Shah, Kelmendi llogaritet si personi më i rrezikshëm në Europë për interesat amerikane.

Me këtë rast, Banka Federale e Shteteve të Bashkuara përmes Interpolit kishte kërkuar ngrirjen e të gjitha aseteve të Naser Kelmendit në Mal të Zi.

Biznesmeni nga Peja, Naser Kelmendi, bashkë me djemtë e tij, vazhdon t’i trazojë organet e drejtësisë në rajon e më gjerë. Ai ka kohë që e ka shndërruar familjen e tij në një grup kriminal, të njohur kryesisht për trafikim të drogës e krim të organizuar.