Konflikti në mes të Serbisë dhe Kosovës është në krye. Një autokolonë ushtarake serbe po shkon drejt kufirit. A po ngrihet fuçi tjetër i barutit në Evropën Lindore tani? Kështu nis artikulli i gazetës zvicerane “Blick”, për tensionet në veri.

Gazeta zvicerane ka marrë mendim të ekspertit gjerman për Ballkanin, Konrad Clewing, për tensionet në Kosovë.

Cila është origjina e konfliktit?

Eksperti gjerman për Ballkanin, Konrad Clewing, nga Instituti për Studime të Evropës Lindore dhe Juglindore në Leibniz, shprehet shkurt: “Serbia mohon ekzistencën e shtetit të Kosovës”.

Kosova shpalli pavarësinë e saj nga Serbia në vitin 2008. Beogradi po inkurajon pakicën serbe në veri të Kosovës në përpjekjet e tyre për të sfiduar autoritetet e Prishtinës, shkruan Blick, transmeton Demokracia.com.

Blick tutje shkruan se sfondi i tensioneve të fundit ishin planet e Qeverisë në Prishtinë për të caktuar zgjedhjet lokale në zonat me shumicë serbe për 18 dhjetor. Partia kryesore serbe njoftoi menjëherë bojkotin e saj dhe derisa autoritetet zgjedhore ishin gati të fillonin përgatitjet në fillim të javës pati të shtëna dhe shpërthime në veri.

Çfarë thonë krerët e qeverive?

Kryeministri i Kosovës, Albin Kurti, zgjodhi fjalë të qarta: “Presidenti dhe kryeministri i Serbisë kërcënuan me agresion ushtarak dhe i bënë thirrje ushtrisë serbe që të kthehet në territorin tonë. Ne nuk kërkojmë konflikt, por dialog dhe paqe. Por, më lejoni të jem i qartë: Republika e Kosovës do të mbrohet me gjithë forcën dhe vendosmërinë e saj”.

Si po reagojnë Zvicra dhe BE?

Zvicra është e shqetësuar për tensionet në rritje dhe ngritjen e barrikadave, tha Departamenti Federal i Punëve të Jashtme (FDFA) në Twitter të hënën. Të dyja palëve u është kërkuar të ndërmarrin veprime të menjëhershme që mund të de-përshkallëzojnë situatën.

Shefi i politikës së jashtme të BE-së, Josep Borrell, dënoi ashpër sulmet. Të gjitha palët duhet të shmangin çdo “përshkallëzim” dhe të sigurojnë qetësi, shpjegoi Borrell në Twitter. Ai u bëri thirrje serbëve të Kosovës që të heqin bllokadat “menjëherë”.

“Perëndimi nuk e kundërshton Serbinë me vendosmëri të mjaftueshme”, kritikon eksperti i Evropës Lindore, Clewing. Kjo, sepse edhe disa shtete evropiane nuk e njihnin pavarësinë e Kosovës. Vendet evropiane që ende nuk e kanë njohur Kosovën përfshijnë Rumaninë, Greqinë, Qipron, Sllovakinë dhe Spanjën.

Sa është i mundur një përshkallëzim i mëtejshëm i luftës?

“Unë mendoj se një pushtim nuk ka gjasa”, shpjegon Clewing.

“Sepse, atëherë Serbia do të duhet të ngatërrohet me KFOR-in e udhëhequr nga NATO”.

KFOR është emri i forcës paqeruajtëse shumëkombëshe që u krijua pas përfundimit të luftës në Kosovë dhe drejtohet nga NATO.

Në vend të kësaj, sipas Clewing, Serbia do të vazhdojë konfliktin kryesisht në nivelin e shërbimit sekret. Në tensionet e ditëve të fundit, ai sheh më së shumti një gjest kërcënues nga Serbia, transmeton Demokracia.com.

Çfarë do të thotë përshkallëzimi për ushtarët zviceranë të stacionuar në Kosovë?

Në Forcën (KFOR) Swisscoy, aktualisht janë të dislokuar 195 burra dhe gra zvicerane.

Kur u pyet nga Blick, qendra e kompetencës zvicerane në Stans NW tha se tensionet mes Kosovës dhe Serbisë aktualisht nuk po shkaktojnë ndonjë ndryshim për ushtarët zviceranë në terren.

Pjesërisht e hapur, pjesërisht e fshehur në veri të Kosovës, Serbia mund të minojë më tej pavarësinë e vendit fqinj. Anasjelltas, do të mbetet e vështirë për Kosovën që të ndërtojë institucionet e saj kundër vullnetit të popullatës me origjinë serbe. Të dyja vetëm sa do ta përkeqësonin situatën.

Prandaj, Konrad Clewing mbron një zgjidhje evropiane.

“Policia e Eulexit dhe KFOR-i, në konsultim me Qeverinë në Prishtinë, duhet të marrin kryesisht përgjegjësinë në rajonin e konfliktit”, shkruan tutje gazeta zvicerane. /Demokracia.com/