Franca ishte ndër shtetet e para që kërkoi progres drejt formimit të Asociacionit të komunave me shumicë serbe. Tash, kur kryeministri Albin Kurti ka konfirmuar që ky është kushti i disa kryeqyteteve evropiane për anëtarësim në Këshillin e Evropës dhe se të njëjtin nuk e pranojnë, Parisi e ka trashur edhe më shumë kërkesën e tyre.
Pavarësisht refuzimit të Qeverisë së Kosovës, kjo kërkesë e Emmanuel Macron qëndron ende. Franca e do Kosovën në KiE, por së pari, po i kërkon “ta kryejë obligimin”.
Në lidhje me këtë çështje, një burim i lartë diplomatik brenda MPJ-së franceze i ka thënë Nacionales:
“Franca mbështet aspiratën e Kosovës për t’iu bashkuar organizatave ndërkombëtare, përfshirë Këshillin e Evropës. Anëtarësimi i Kosovës në Këshillin e Evropës të sillte dobi për popullin, duke përfshirë ata nga minoritetet…”.
Megjithatë, ky burim ka ripërsëritur se presin përparim të pakthyeshëm drejt zbatimit të Asociacionit, duke shtuar se “ky është një zotim i kahershëm i ndërmarrë nga Kosova”.
“Në këtë kontekst, presim përparim të pakthyeshëm drejt zbatimit të Asociacionit të Komunave me shumicë Serbe i cili është një zotim i kahershëm ligjor i ndërmarrë lirshëm nga Kosova. Kjo është një çështje e sundimit të ligjit dhe mjeti më i prekshëm për qeverinë e Kosovës për të ilustruar përkushtimin e saj ndaj të drejtave të anëtarëve të grupeve minoritare.”
Para pak ditësh, presidenti francez në një bisedë me Kurtin, ia përmendi atij “progresin e shpejtë e të pakthyeshëm” për Asociacionin, në kontekstin e anëtarësimit në KIE.
Ai [Macron] nënvizoi rëndësinë që Franca i kushton, në kontekstin e aplikimit të Kosovës për anëtarësim në Këshillin e Evropës, progresit të shpejtë dhe të pakthyeshëm në zbatimin nga autoritetet kosovare të Asociacionit të Komunave me shumicë serbe.” – thuhej në komunikatë.
Do të kalonin disa ditë nga kjo bisedë, kur kryeministri Albin Kurti do të pranonte që ka një kushtëzim për anëtarësim në KiE. Në një mbledhje të Qeverisë gjatë kësaj jave, ai u shpreh:
“Pas tërë këtij rrugëtimi të shoqëruar me progres të vazhdueshëm në fushën e të drejtave të njeriut, demorkacisë dhe sundimit të ligjit, këto javë u përballëm me kusht të ri që s’ka të bëjë aspak me standradet e anëtarësimit në këtë organizatë”.
Në lidhje me shtetet aleate, këtu duke përfshirë edhe Gjermaninë e Italinë që kanë të njëjtin kusht si Franca, Kurti para ministrave të tij deklaroi:
“Pengesat për anëtarësim i mendonim nga shtete që s’e njohin Kosovën, por assesi e asnjëherë s’e mendonim që pengesë do të bëheshin shtetet demokratike që kanë qenë dhe vazhdojnë të jenë përkrahëse të Kosovës për zhvillim e demokratizim e më herët ishin krah nesh për çlirim e pavarësim”.
