Udhëtarët dhe personeli i Aeroportit Ndërkombëtar “Adem Jashari” janë larguar nga objekti, pas marrjes së informacionit për bombë.
Në fotografitë e dërguar në redaksinë e Demokracia.com shihen qytetarët jashtë objektit të aeroportit.
Lidhur me rastin janë deklaruar Policia e Kosovës dhe Aeroporti “Adem Jashari”.
Zëdhënësja e Aeroportit Ndërkombëtar “Adem Jashari”, Valentina Gara tha se kanë pranuar një kërcënim për bombë.
“Kemi pranuar një kërcenim me bombë. Udhëtarët dhe personeli janë evakuuar dhe janë të sigurt. Ekipet e involvuara në planin emergjent janë duke kryer detyrat e tyre”, tha Gara për Demokracia.com.
Ndërsa nga Policia e Kosovës kanë bërë të ditur se kanë pranuar një informacion për mjete shpërthyese në Aeroportin Ndërkombëtar “Adem Jashari”.
Në njoftimin e thuhet se Policia menjëherë ka ndërmarrë të gjitha masat dhe veprimet e nevojshme policore në funksion të trajtimit dhe hetimit të këtij rasti./Demokracia.com/