Kryeministri në detyrë, Albin Kurti, është takuar të enjten me ministrin e Zhvillimit Rajonal, njëherësh kryetar i Partisë Demokratike Turke të Kosovës, Fikrim Damka, ndaj të cilit është ngritur aktakuzë për veprat penale “Sulm” dhe “Kanosje”.

Gjatë takimit, Kurti dhe Damka kanë diskutuar për hapat e mëtejmë në formimin e institucioneve.

“Bashkë diskutuan për hapat përpara për formimin e institucioneve të legjislaturës së 9-të të dalë nga zgjedhjet e rregullta parlamentare të 9 shkurtit”.

“Kryeministri Kurti falënderoi z. Damka për punën si ministër i kabinetit në këtë mandat të plotë të qeverisë dhe për bashkëpunimin e afërt si në qeveri ashtu edhe në kuvend. Të dyja palët shprehën vullnetin dhe gatishmërinë që ky bashkëpunim i frytshëm të vazhdojë edhe në legjislaturën në vijim”, thuhet në komunikatë.

Ky takim është mbajtur në kuadër të konsultimeve të Kurtit me partitë politike të komuniteteve joshumicë për formimin e qeverisë së re, pas certifikimit të rezultateve nga Komisioni Qendror i Zgjedhjeve (KQZ), transmeton albanianpost.

“Gjatë ditës, kryeministri do të zhvillojë takime edhe me drejtues dhe përfaqësues të tjerë të partive të komuniteteve joshumicë, të cilat kanë fituar mandate përfaqësimi në Kuvend”.

Kurti të enjten është takuar edhe me kryetaren e Unionit Socialdemokrat nga komuniteti boshnjak, Dude Balje, e cila s’mori konfirmim nga Kurti lidhur me kërkesat e saj.

Zyra e Presidentes së Kosovës ka caktuar 15 prillin si ditën kur pritet konstituimi i Kuvendit të Kosovës, pas zgjedhjeve parlamentare të 9 shkurtit.