Ka filluar seanca gjyqësore ndaj Salih Mustafës në Hagë.

Veterani i Ushtrisë Çlirimtare të Kosovës, Sejdi Veseli është dëshmitari i radhës në gjykimin që po zhvillohet ndaj Salih Mustafës për krime lufte pranë Dhomave të Specializuara të Kosovës në Hagë.

Dëshmitari Veseli e ka filluar dëshminë e tij në gjykatore, të martën, shkruan Arbresh.info.

“Aktakuza e konfirmuar përcakton se afërsisht midis 1 prillit 1999 dhe 19 prillit 1999, në një kompleks ndalimi në Zllash, Kosovë, u kryen krimet e ndalimit arbitrar, trajtimit mizor dhe të torturës kundër të paktën gjashtë personave. Gjithashtu, në aktakuzë thuhet se në një datë midis 19 prillit 1999, ose rreth kësaj date, dhe rreth fundit të prillit 1999, në atë vendndodhje u vra një i ndaluar”, ka njoftuar Gjykata Speciale përmes një komunikate.

Po ashtu është konfirmuar se në aktakuzën e konfirmuar, Salih Mustafa akuzohet në kuadër të formave të ndryshme të përgjegjësisë penale, për ndalim arbitrar, trajtim mizor, torturë dhe vrasje të paligjshme si krime lufte të kryera në kontekstin e konfliktit të armatosur jo ndërkombëtar në Kosovë, ose në lidhje me atë konflikt.