Sot bëhen katër vite nga ndarja prej jetës e legjendës shqiptare të futbollit dhe njëherit ish-kryetari i FFK-së, Fadil Vokrri.
Me rastin e përvjetorit të katërt të vdekjes së Vokrrit, shumë personalitete të njohura të futbollit vendor kanë reaguar duke e kujtuar atë, shkruan Demokracia.com.
Vokrrin e ka përkujtuar edhe ish-klubi i tij sa ishte futbollist, FC Prishtina.
Këta të fundit nëpërmjet faqes zyrtare të në rrjetet sociale kanë shkruar se Vokrri ka mbetur inspirim për gjeneratat e reja.
Postimi i plotë:
4 vjet pa legjendën Fadil Vokrri!
Sot u bënë katër vjet prejse u nda nga jeta legjenda e futbollit tonë, Fadil Vokrri.
Vokrri ndërroi jetë më 9 qershor të vitit 2018, duke lënë prapa një karrierë të jashtëzakonshme si futbollist e më pas si drejtues i Federatës së Futbollit të Kosovës, me ç’rast nën drejtimin e tij futbolli ynë u pranua në UEFA dhe FIFA.
Dikur 9-shi i FC Prishtinës, i cili ka qenë pjesë e gjeneratës së artë të klubit tonë në vitet 1980-1986, mbetet inspirim për gjeneratat e reja.
Rreth 172 ndeshje zyrtare dhe 55 gola të shënuar për gjashtë vjetët e tij në kryeqendrën e Kosovës, adhuruesit e Prishtinës nuk do ta harrojnë asnjëherë.
Në karrierën e tij si futbollist, Vokrri ka luajtur te FC Prishtina, Partizani, Nimes, Fenerbahçe, Bourges dhe Montiuçon.
Ai e ka përfaqësuar ish-Jugosllavinë në nivel ndërkombëtar, me të cilën ka realizuar 12 paraqitje dhe ka shënuar gjashtë gola./Demokracia.com/