Presidenti i Turqisë ka paralajmëruar se hyrja e Finlandës dhe Suedisë në NATO do të sjellë rreziqe sigurie për vendin e tij dhe vetë organizatën.

“Turqia pohon se pranimi i Suedisë dhe Finlandës sjell rreziqe për sigurinë e saj dhe të ardhmen e organizatës,” shkroi Presidenti Rexhep Tayip Erdogan në një artikull të botuar nga The Economist.

Erdogan tha se aktivitetet e Partisë së Punëtorëve të Kurdistanit (PKK) janë pjesë e arsyes pse Turqia po kundërshton që Suedia dhe Finlanda të bashkohen me aleancën mbrojtëse.

PKK ka zhvilluar një kryengritje 38-vjeçare kundër Turqisë për pavarësinë kurde, e cila ka çuar në mijëra të vdekur.

Është cilësuar si një grup terrorist nga Shtetet e Bashkuara dhe Bashkimi Evropian, duke përfshirë Suedinë dhe Finlandën.

Megjithatë, ka pasur tensione midis Ankarasë dhe anëtarëve të tjerë të NATO-s lidhur me qëndrimin e Perëndimit ndaj krahut të PKK-së në Siri, Njësitë e Mbrojtjes së Popullit (YPG).

YPG ka luajtur një rol kyç në luftimin e Shtetit Islamik në terren në Siri, së bashku me koalicionin e udhëhequr nga SHBA.

Erdogan përsëriti thirrjet për Finlandën dhe Suedinë që të ekstradojnë njerëzit e Ankarasë të dyshuar për veprimtari terroriste dhe të mbështesin “operacionet anti-terror të anëtarëve të NATO-s”.

Të dyja shtetet skandinave vendosën kufizime të eksportit të mbrojtjes ndaj Turqisë pas operacionit të saj ushtarak të vitit 2019 në Sirinë verilindore kundër YPG-së.

Turqia tha më parë se do të bllokojë pranimin e tyre nëse nuk ndërmerren hapa, por udhëheqësit e NATO-s shpresojnë të shtyjnë përpara zgjerimin historik në një samit në fund të qershorit.

Në artikullin e The Economist, presidenti turk përcaktoi rolin e Turqisë në “aleancën më të madhe ushtarake në histori”, ndërsa u bëri thirrje anëtarëve të tjerë të NATO-s që të bindin Suedinë dhe Finlandën të ndryshojnë pozicionet e tyre.

Turqia është anëtare e NATO-s që nga viti 1952.