Presidenti turk Rexhep Tajip Erdogan thotë se i tha kryeministres suedeze Magdalena Andersson, se Ankaraja pret hapa konkretë në lidhje me shqetësimet e saj për “organizatat terroriste”, njoftoi agjencia shtetërore e lajmeve Anadolu.

Në një telefonatë, Erdogan tha gjithashtu se një embargo e eksporteve të armëve të vendosura ndaj Turqisë pas inkursionit të saj në Siri në vitin 2019, duhet të hiqet.

Finlanda dhe Suedia aplikuan zyrtarisht për t’u anëtarësuar në NATO të mërkurën, pas pushtimit të Ukrainës nga Rusia më 24 shkurt.

Turqia i befasoi aleatët e NATO-s javën e kaluar duke kundërshtuar anëtarësimin e dy vendeve, por udhëheqësit perëndimorë kanë shprehur besimin se kundërshtimet e Ankarasë nuk do të jenë një pengesë për procesin e pranimit në NATO.

Ankaraja thotë se Suedia dhe Finlanda strehojnë njerëz të lidhur me grupin e armatosur të Partisë së Punëtorëve të Kurdistanit (PKK) dhe ndjekës të Fethullah Gulen, të cilin Ankaraja e akuzon për orkestrimin e një përpjekjeje për grushtet në vitin 2016.