Një tërmet me magnitudë 6.3 ballë la të paktën 20 persona të lënduar, dhjetëra ndërtesa të dëmtuara dhe ndërpreu energjinë elektrike në qytetin portual të Esmeraldas në Ekuador.

Sipas shërbimeve të reagimit ndaj emergjencave të Ekuadorit, 20 personat e lënduar pësuan plagë në kokë dhe plagë të tjera – nga lëkundja të premten, e cila u ndje deri në kryeqytetin Quito.

“Ishte shumë e fortë”, tha ish-kandidati presidencial Yaku Perez për AFP nga vendi i ngjarjes.

Atje janë parë mure të shembura, fasada që ishin shembur mbi një rrugë në një grumbull rrënojash dhe disa ndërtesa të çara.

Dhe familjet qëndruan përreth duke vëzhguar dëmet.

Autoritetet thanë se 60 shtëpi dhe një qendër shëndetësore ishin dëmtuar, ndërsa fasada e një ndërtese ushtarake u shemb pjesërisht. Dy rrugë dhe një urë u dëmtuan gjithashtu.

Kompania kombëtare e naftës Petroecuador bëri të ditur se kishte “pezulluar operacionet” në rafinerinë Esmeraldas dhe një tubacion aty pranë.

Daniel Noboa, presidenti i rizgjedhur i kombit të Amerikës së Jugut, theksoi se kishte angazhuar ministrat që të shkojnë në vendngjarje për të ndihmuar në koordinimin e ndërtimit të strehimoreve dhe shpërndarjen e ndihmës humanitare.

Studimi Gjeologjik i SHBA-së dhe monitorët lokalë thanë se tërmeti goditi pranë bregdetit në një thellësi prej rreth 35 kilometrash (22 milje) pak para orës 7:00 të mëngjesit sipas orës lokale.

Për fat të mirë, autoritetet ekuadoriane thanë se nuk kishte rrezik cunami nga tërmeti.

Ekuadori ndodhet në një nga zonat më gjeologjikisht aktive në Tokë dhe çarja midis pllakave Nazca dhe Amerikës së Jugut shtrihet përgjatë bregdetit të tij.