Duke mos u mjaftuar me Korporatën Energjetike të Kosovës, Shërbimin Korrektues, e borde të ndryshme, Lëvizja Vetëvendosje siç duket po tenton “ta kap” edhe Agjencinë e Shërbimeve të Navigimit Ajror (ASHNA), raporton Demokracia.com.
Ministria e Mjedisit, Planifikimit Hapësinor dhe Infrastrukturës ditë më parë ka hapur konkurs për pozitën e zëvendësdrejtorit të Shërbimeve Administrative Financiare.
Demokracia.com ka siguruar dokumentin e kandidatëve që janë radhitur në listën e ngushtë nga komisioni përzgjedhës, ku figuron edhe emri i ish-kandidati i LVV-së për deputet, Besnik Zeqiraj.
Ky i fundit, është një nga tetë kandidatët që kanë arritur të jenë në listën e ngushtë për këtë pozitë, derisa Demokracia.com mëson se testi për t’u punësuar pritet që të mbahet nesër.
Zeqiraj në llogarinë e tij në Facebook, thuajse secilin postim e ka për partinë në pushtet, derisa në biografinë e tij shkruan se punon në Lëvizjen Vetëvendosje.
Demokracia.com ditëve të fundit ka raportuar për punësimet e LVV-së në disa institucione.
Dhjetra persona të punësuar së fundi në KEK, janë militantë dhe përkrahës të LVV-së, ose kanë lidhje me ata.
Veç kësaj, Demokracia.com ka raportuar edhe për punësimet në Shërbimin Korrektues të Kosovës, ku të paktën pesë persona që kanë fituar pozita në këtë institucion, e përkrahin pushtetin.
Opozita në Kosovë ka mbledhur 40 nënshkrime për komisionin hetimor për çështjet me energjinë dhe punësimet në KEK.
Ndërkaq, edhe Prokuroria e shtetit dhe Departamenti i Krimeve të Rënda, Njësiti për Krime Ekonomike dhe Korrupsion, ka nisur hetimet lidhur me punësimet masive në KEK./Demokracia.com/
Lexo edhe:
