Edhe sot, në Dhomat e Specializuara të Kosovës në Hagë do të vazhdojë procesi gjyqësor ndaj Hysni Gucatit dhe Nasim Haradinaj.

Gjykata Speciale ka rifilluar punën e saj këtë javë, pas pushimit dimëror, shkruan Demokracia.com.

Gjatë dëshmisë së tij, Haradinaj, i cili po akuzohet për publikimin e dokumenteve që dyshohet të kenë rrjedhur nga Specialja, ka thënë se të gjitha veprimet e OVL-UÇK-së janë ndërmarrë për shkak të transparencës.

“Ka qenë qëllimi që diçka çka na është sjellë neve të jetë transparente, për të treguar, për të mos mbajtur diçka fshehur. Unë do ta kisha ndierë vetën shumë më shumë fajtor, zotëri prokuror, po të kisha mbajtur fshehtë këto dhe po të kisha bërë diçka tjetër me to, në kuptimin e kësaj, për të qenë koherent me kohën kur kanë ardhur. Shiko kohën kur kanë ardhur dhe kur i kemi qitë”, ka thënë Haradinaj.

Nga prokurori, përveç çështjes së dosjeve, ai është pyetur edhe nëse mendon që UÇK-ja mund të ketë kryer krime, derisa Haradinaj ka thënë se Ushtria Çlirimtare e Kosovës dhe ai, si pjesë e saj, gjatë luftës në Kosovë, nuk kanë synuar civilët, por vetëm kanë mbrojtur vendin dhe janë përballur me ushtrinë serbe.

“Po, kam vrarë ushtarë serbë edhe oficerë, që ata thonë që është oficer, se unë nuk e kam ditë çka ka qenë, po nuk ka këtu të bëjë me civilë asnjë gjë. Unë nuk jam kthyer nga Suedia edhe për të dhënë lule, derisa jam kthyer të hyj në front. Kam pranuar të vdes vetë. Unë kam qenë në front, po flas për pikën e frontit, nuk jam marrë me civilë, as nuk jam marrë pas luftës më me këto sende. Është çliruar vendi im dhe në rregull është. Jam plagosur prej tyre, që kam mundur të jem edhe i vrarë, dhe nuk po lyp askush llogari pse më kanë plagosur. Në rastin tim, as nuk po lyp llogari pse më kanë plagosur, as nuk po jap llogari pse kam gjuajtur në ta, derisa kam qenë i sulmuar, në vetëmbrojtje kam qenë, në vendin tim më kanë sulmuar”, ka thënë Haradinaj.

Dëshmia e Nasim Haradinajt, e filluar më 11 janar, para Dhomave të Specializuara, do të vazhdojë edhe nesër.
Hysni Gucati dhe Nasim Haradinaj u arrestuan më 25 shtator 2020, prej kur edhe po qëndrojnë në paraburgim në Hagë.

Rrjedhja e disa dokumenteve nga Specialja, të cilat, nga një person ende i panjohur, janë dërguar në zyrat e OVL-UÇK-së, dhe bërja publike e kësaj ngjarjeje nga krerët e organizatës është arsyeja pse po gjykohen Gucati e Haradinaj.

Mbi ta rëndojnë akuzat për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, hakmarrje dhe shkelje të fshehtësisë së procedurës./Demokracia.com/