Janë shtuar ankesat e kandidatëve për deputetë nga parti të ndryshme për manipulime të ndryshme me vota.

Së fundmi edhe ish-kandidati për deputet nga Lëvizja Vetëvendosje, Liri Loshi ka hedhur dyshime se atij mund t’i jenë vjedhur vota.

Ai këto pretendime i ka bërë të dituar përmes një shënimi në Facebook.

“Ka një mospërputhje që kam hetuar me votat e mia në Pejë, bie fjala, ku komisionorët numëruan 353 vota në emrin tim, ndërkohë që nga të dhënat e KQZ dolën të ishin vetëm 214 vota! Pra, në Pejë, sipas kësaj mospërputhje më munguan 139 vota. Mospërputhje të ngjashme mund të ketë pasur gjithandej Kosovës, por unë rastësisht këtë defekt e kam kapur në Pejë”, ka shkruar Loshi.

Loshi i cili jeton dhe vepron në Kanada thotë se shumë më tepër vota ka pritur edhe nga diaspora por që nuk doli të jetë kështu.

“Tjetër, unë kam pritur që nga diaspora të kisha një numër të konsiderueshëm votash, por ndodhi që të regjistrohen vetëm 314 vota! Vetëm në Kanada, vetëm në SHBA, vetëm në Angli, apo vetëm në Suedi do të duhej të kisha mbi 300 vota. Tē mos flas për Zvicër dhe Gjermani, ku ka pasur potencial edhe më të madh për votat e mia. Pra, pritja ime ishte bukur reale, sepse unë prisja nja 2000 apo 3000 vota nga diaspora, meqë isha kandidat për deputet i diasporës nga partia më favorite në këto zgjedhje, siç ishte Lëvizja Vetëvendosje. Besoj se nëse shohim se cilit deputet iu shtuan disa mijëra vota nga diaspora nga këta që kishin numër të përafërt votash me mua, apo edhe më pak dhe që nuk ishin kandidatë nga diaspora, atëherë del sheshit se kah u zhdukën votat e mia, apo edhe të ndonjë kandidati tjetër”, ka shkruar ai.

Loshi thotë se një rinumërim i votave të diasporës do ta ndryshonte rezultatin e shumë kandidatëve.