Trupi i pajetë i 22-vjeçares shqiptare, Ilaria Sula, e cila rezulton e zhdukur që prej 25 marsit në zonën Furio Camillo të Romës, është gjetur i pajetë në një valixhe.

Trupi i studentes shqiptare mësohet se u gjet në një zonë pyjore në Poli.

Valixhja me trupin e 22-vjeçares thuhet se ishte hedhur në një shkëmb dhe u zbulua nga persona që po frekuentonin zonën, që ndodhet në brendësi të kryeqytetit.

Referuar të përditshmes italiane Corriere della Sera, e reja kishte pasur lidhje me një shtetas filipinas, i cili është ndaluar nga policia italiane.

Ajo studionte në Universitetin La Sapienza, ndërsa ishin miqtë dhe familjarët e viktimës që ngritën alarmin për zhdukjen e saj.

Hetimet mori kthesë mbrëmjen e së martës kur hetuesit mbërritën në banesën e filipinasit në via Homs, në lagjen afrikane, ku policia mjeko-ligjore kreu një inspektim në mëngjes.

Ai është marrë nga autoritetet dhe po merret në pyetje nga prokurorët e koordinuar nga zv/prokurori i prokurorisë së Romës Giuseppe Cascini.

Sipas raporteve fillestare, djali dyshohet se e ka goditur disa herë me thikë Ilarian para se ta mbyllte në një valixhe dhe të përpiqej ta hiqte qafe trupin e saj.

Nuk përjashtohet as fakti që të ketë qenë ai që ka treguar vendndodhjen ku është gjetur viktima.

Akuzat që rëndojnë mbi të janë për vrasje me dashje dhe fshehje të kufomës.

Në mbrëmjen e zhdukjes së saj, Ilaria me sa duket ishte larguar nga shtëpia me nxitim për të takuar dikë.

Prindërit e saj, të cilët jetojnë në Terni, raportuan se ajo nuk kishte marrë asgjë me vete, ndërsa celulari i saj ishte i ndezur deri në një pikë dhe se dikush madje i ishte përgjigjur mesazheve të tyre.

Mbetet e paqartë nëse ishte vërtet Ilaria që ka shkëmbyer mesazhet.