Edhe Shqipëria do t’i shtojë dronët Bayraktar në arsenalin e armëve ushtarake.

Këtë gjë e ka konfirmuar mbrëmjen e kësaj të enjte kryeministri shqiptar, Edi Rama.

“Duke parë rrjedhën e ngjarjeve, Shqipëria do të marr dronët Bayraktar të prodhuar nga Turqia”, ka deklaruar Rama në emisionin “Opinion” të Blendi Fevziut.

Listës së gjatë të klientëve për dronët turq, Bayraktar i është shtuar edhe Serbia.

Në fillim të shtatorit, presidenti i Serbisë, Aleksandër Vuçiq deklaroi arritjen e një marrëveshjeje me Turqinë për të blerë dronë Bayraktar, të cilët tashmë kërkohen nga të gjithë për shkak të efikasitetit të treguar në luftën në Ukrainë.

Droni TB2 (Bayraktar) është zhvilluar në Turqi nga Selcuk Bayraktar, i diplomuar në Institutin e Teknologjisë të Masaçusetsit.

Bayraktar TB2 mund të qëndrojë në qiell deri në 27 orë dhe kjo mundësohet nga një motor i thjeshtë me helikë dhe po ashtu mund të fluturojë deri në 150 kilometra nga baza e tij.

Kjo fluturake, po ashtu, mund të pajisjet me katër raketa të llojit të “mikro municioneve të mençura”, që janë mjaft të sakta për të shkatërruar automjete të blinduara nga disa kilometra distancë.