Është në listën e zezë të Shteteve të Bashkuara të Amerikës. Ishte i dyshuar për vrasjen e politikanit serb, Oliver Ivanoviq. Tash, dyshohet për frikësim të dëshmitarëve në rastin Brezovica. U arratis tri herë nga Policia e Kosovës. Me kaq pak fjali, mund të përshkruhet figura e nënkryetarit të Listës Serbe, Milan Radojiçiq.
Radojiçiqi që në përgjimet e publikuara nga Nacionale mes Mimoza Kusarit e Slavko Simiq quhet shkurt në emrin e tij “Milan”, po del se ka komunikuar edhe me shefen e deputetëve të VV-së.
Kjo është zbardhur në përgjimet e publikuara, e ku Kusari-Lila e pranon se ka folur me Radojiçiqin. Por, thotë “2-3 minuta”.
Por, kush është Milan Radojiçiq?
Radojiçiq që është sanksionuar nga Amerika, dyshohet për frikësim dhe ndikim te dëshmitarët për rastin e ndërtimeve në Brezovicë. Në listën e të kërkuarve ai u fut nga Prokuroria e Ferizajt, më saktësisht prokurori Rasim Maloku.
Një nga grupet kriminale të rrezikshme gjithashtu në Mitrovicën e Veriut, ishte ai me emrin “Mjekrroshat” apo në serbisht “Bradonja”. Edhe ky grup, udhëhiqej nga i sanksionuari nga Amerika, Milan Radojiçiq.
Ky grup përkujdesej për tensionimin e situatës në veriun e vendit, dhe merrej me aktivitete të ndryshme kriminale. Këtë e kishte konfirmuar edhe ish-prokurori Sylë Hoxha.
“Ai (Radojiçic) e ka edhe një grup tjetër të ashtëquajtur ‘Mjekrroshat’ apo ‘Bradonja’ ku ka pasur persona që kanë ardhur nga Serbia që kanë kryer vepra kriminale atje dhe janë ardhur janë strehu në pjesën Veriore, përpos që kanë kryer vepra penale tjera këtu ata kanë qenë edhe mbrojtja e Radojocicit”, deklaronte Sylë Hoxha.
Në këtë grup ishte i përfshirë edhe Zvonko Veselinoviq.
Rasti më tipik për fuqinë e këtyre grupeve kriminale është vrasja e politikanit serb, Oliver Ivanoviq. Procesi për këtë rast po shkon tepër ngadalë, pasi dëshmitarë e kanë konfirmuar zyrtarisht se ndihën të frikësuar nga grupet e caktuara që veprojnë në Veriun e Kosovës.
Milan Radojiçiq i njohur si bosi i veriut bashkë me Zvonko Veselinoviqin, është në listën e zezë të Shteteve të Bashkuara të Amerikës. E të zeza po del se janë edhe aksionet për ta arrestuar Radojiçiqin. Kjo pasi asnjë prej tyre, nuk ka realizuar me sukses.
Në nëntorin e vitit 2018, Policia e Kosovës kishte ndërmarrë një aksion për të arrestuar disa persona për vrasjen e Oliver Ivanoviqit. U arrestuan disa persona, por sërish ‘çuditërisht’ në banesën e tij nuk u gjet Milan Radojiçiq. Ai arriti të arratiset.
Megjithatë, urdhër-arresti i gushtit të vitit 2020 për Radojiçiqin, ishte anuluar më 23 shkurt të vitit 2021. Kjo pa asnjë arsyetim, e as sqarim për publikun se si ndodhi.
Kurse, në fillim të shkurtit të këtij viti, Milan Radojiçiq kishte mësyrë Kosovën nga pika kufitare në Bërnjak. Pasi u ndalua nga Policia e Kosovës, ai e ktheu veturën dhe iku nga vendi i ngjarjes. Kamerat në atë kohë nuk po punonin, si rezultat disa policë u suspenduan. Por, ata pas pak ditësh sërish u kthyen në vendin e ngjarjes. Edhe një arratisje kjo e të fortit të veriut.
Më 5 korrik të vitit të kaluar, Radojiçiq ishte paraqitur me një video nga kodra në veri, ku ishte zotuar për mbrojtjen e serbëve.
“Terrori i vërtetë kundër popullit tonë serb po fillon tani. Për popullin tim në veri dhe për të gjithë serbët, vetëm më lejoni t’u them, dhe atyre të tjerëve, unë jam këtu, jam kthyer dhe ju e dini se çfarë do të thotë sepse nga këtu nuk ka kthim prapa. Rroftë Serbia”, tha Radojçiq nga Leposaviqi.
Radojiçiq bashkë me Zvonko Veselinoviq dyshohet se ishin pjesë e grupeve kriminale në veriun e vendit që vendosnin barrikada, digjnin vetura e kryenin kontrabandë në atë zonë.
Mimoza Kusari Lila, shefja e deputetëve të VV-së, ka bërë reagimin e parë pas përgjimeve të publikuara nga Nacionale ku ajo dëgjohet derisa e pranon se ka komunikuar me Millan Radojiçiqin në një bisedë me Sllavko Simiqin. Tash, ajo po e mohon një gjë të tillë.
Kusari ka deklaruar se në atë diskutim me Sllavko Simiqin e Listës Serbe kanë folur për tri projekt-ligje që pritej të silleshin në Kuvendin e Kosovës.
“Ka 15 muaj që Lista serbe nuk është pjesë e Kuvendit, nëse atyre po ju mungon e dinë ku i kanë adresat, në kohën kur kanë qenë pjesë e Kuvendit, komunikimi ka qenë tërësisht në bazë të komunikimit brenda Kuvendit, brenda seancës për agjenda…” – është shprehur ajo për Ekonomia Online.
“Pra krejt ka qenë në këtë kuptim, përderisa për aludimin e komunikimit të personit në fjalë për mua kontakt në Kuvendin e Kosovës kanë qenë dy përfaqësues, shefi i deputetëve Igor Simiq dhe Slavko Simiq, që tash e kanë treguar që përkundër përpjekjeve për çfarëdo normaliteti në kuptimin e përfaqësimit të interesave, ata kanë komunikim dhe sjellje abnormale, edhe këto supozime të një portali në veçanti, e tregojnë përpjekjen e dëshpëruar të tyre për të treguar një pamje tjetër për asaj se çfarë po ndodh në terren,” – u shpreh tutje shefja e Grupit Parlamentar të Vetëvendosjes.
Kusari deklaroi se nuk ka komunikuar asnjëherë me nënkryetarin e Listës Serbe, Millan Radojiçiqin, përkundër që një gjë të tillë e pranon vetë në bisedën e përgjuar me Simiqin.
“Unë nuk kam as numër, as komunikim me Milan Radojçiqin. Unë i përmenda, kanë qenë dy përfaqësues institucionalë këtu që ishin, përderisa gjatë gjithë kohës i kam refuzuar dhe i kam rezistuar komunikimit me të dhe komunikimi çfarë kanë pasur Lista serbe me Milan Radojçiqin është çështje e tyre. Ata e kanë nënkryetar, ai dihet se si është dhe në Qeverinë Kurti është kthyer aktakuza dhe është kthyer urdhërarresti, prandaj edhe në momentin kur ai do të zihet ai do të arrestohet. Prandaj nuk ka ndonjë hapësirë për ndonjë komunikim tjetër në raport me këtë person,” – vazhdoi tutje ajo.
