Paraqitja e Trump në sallën e gjyqit në Manhatan të hënën pason dëshminë e dy prej djemve të tij javën e kaluar dhe ish-presidenti u qortua nga gjyqtari Arthur Engoron për shndërrimin e dëshmisë së tij në një “miting politik”.

“Nuk kemi kohë për të humbur. Ne kemi një ditë për ta bërë këtë”, tha një Engoron i acaruar.

Ish-presidenti po lufton me një listë të gjatë problemesh ligjore, duke përfshirë katër gjyqe penale, disa të lidhura me përpjekjet e tij të supozuara për të përmbysur rezultatet e zgjedhjeve të vitit 2020, përveç gjyqit civil të fokusuar në praktikat e tij si biznesmen.

Megjithatë, problemet e tij ligjore kanë bërë pak për të dëmtuar popullaritetin e tij me votuesit republikanë dhe ai mbetet favoriti dërrmues në garën për t’u bërë kandidati i partisë për zgjedhjet e 2024 në SHBA.

Avokatët kanë argumentuar se Trump përdori metoda mashtruese për të fryrë artificialisht vlerën e tij neto, duke i dhënë atij akses në kredi dhe marrëveshje të favorshme.

Në fund të shtatorit, gjykatësi Arthur Engoron vendosi se Trump kishte kryer me të vërtetë mashtrim për vite me radhë duke e mbivlerësuar masivisht pasurinë e tij.

Disa pretendime të tjera në këtë rast ende nuk janë zgjidhur, krahas dënimit të mundshëm.

“Ai më quajti mashtrues dhe nuk dinte asgjë për mua”, tha Trump për gjykatësin që ishte ulur pranë tij gjatë dëshmisë së tij të hënën.

“Jam i sigurt se gjyqtari do të vendosë kundër meje, sepse ai gjithmonë vendos kundër meje”, tha ai gjithashtu.

Prokurorja e Përgjithshme, Letitia James, e cila ngriti çështjen kundër Trump, djemve të tij, Donald Jr dhe Eric, dhe drejtuesve të Organizatës Trump, po kërkon 250 milionë dollarë gjobë dhe ndalim të Trumpit ose djemve të tij që të bëjnë biznes në shtetin e New Yorkut.