Lajme
DOKUMENT | Martin Berishaj i skandaleve synon këtë vit ta pastrojë imazhin në mediat kroate, nuk i ndahet energjetikës
Demokracia
21:08 | 13 Shkurt 2023

Share:

Ambasadori Martin Berishaj, i përfolur dhe i akuzuar për shumë skandale milionëshe të mafias energjetike të Ballkanit, s’po mund ta anashkalojë energjetikën. 

Gjatë muajit prill të vitit 2021, mediat në Slloveni raportuan për përfshirje në shpëlarje parash të tani kryeministrit slloven, Robert Golob, e që sipas po të njëjtave burime, ambasadori Martin Berishaj e kishte bërë transportimin e parave kesh nga kompania e tij në Mal të Zi tek politikani slloven.

Demokracia.com ka siguruar planin e punës së ambasadorit të Kosovës në Kroacia ku ai flet edhe për energjinë.

Te plani i tij për zhvillimin e diplomacisë ekonomike, Berishaj synon që posaçërisht të punojë në promovimin e segmenteve të energjetikës, zhvillimit të infrastrukturës, turizmit, bujqësisë e shëndetësisë.

“Sprovë për thellimin e marrëdhënieve ekonomike në mes dy vendeve do të mund të realizohet me ndihmën e atasheut ekonomik i cili do të përshpejtonte këto nisma ekonomike nga ambasada jonë i cili do të ishte më se i nevojshëm në komunikimet e ndërsjella në mes dy vendeve. Institucioni i tillë do të ishte urë lidhëse me ministrinë gjegjëse si dhe me Odën Ekonomike të Kosovës. Promovimi i Kosovës në rrethet ekonomike/të biznesit do të krijonte bazën e të dhënave të të gjitha bizneseve kroate dhe atyre kosovare, gjegjësisht do të ndërmerrte hapa konkret në promovimin e bizneseve të Kosovës, posaçërisht në segmentet e zhvillimit të infrastrukturës, bujqësisë, energjetikës, turizmit, shëndetësisë”, thuhet në dokument.

Por më e çuditshme është se Berishaj i cili nuk i honeps dot mediat e Kosovës e të Sllovenisë këtë vit do të tentojë që të përdorë media të njohura atje për ta pastruar imazhin e tij.

“Theks të vecantë do të vebdosim në promosimin e Kosovës dhe të arriturave të saj në aspektin politik, kulturor dhe ekonomik. Pjesëmarrja në ligjërata të organizuara nga mediumet me influemcë në shtet. Konferenca të organizuara nga ambasada në bashkëpunim me media vizive dhe ato të shkruara duke tentuar që sit ë tilla të publikohen në buletine dhe revista të ndryshme. Caku do të ishte të orientojë komunikim me institucione të rëndësisë së vecantë shkencore. D0 të tentohet organizimi i tryezave të rrumbullakta, publikimi i intervistave dhe kolumnave. Promovimi i etnografisë dhe trashëgimisë material promovimin e trashëgimin kulturore në Kosovë si dhe turizmit malor”, ka shkruar Berishaj në planin e tij të punës për vitin 2023.

Kujtojmë që ndaj ambasadorit të Kosovës në Kroaci, Martin Berishaj, është ngritur kallëzim penal.

Kjo është bërë nga ana e Agjencisë Kundër Korrupsionit (AKK). Kallëzimi penal ndërlidhet me mos-deklarimin e kompanisë që Berishaj e posedon në Mal të Zi.

Tashmë, ky rast është në duart e institucioneve të drejtësisë, më saktësisht Prokurorisë së Shtetit.

Në muajin prill,  të vitit të kaluar mediat në Slloveni kanë raportuar për një skandal të madh financiar që kishte shpërthyer atje.

Aty ishte përfshirë ambasadori Martin Berishaj.

Berishaj nuk e kishte deklaruar kompaninë e tij “MB Consulting” në deklarimin e pasurisë në vitin 2022.

Sipas deklarimit i cili është publik në ueb-faqen e Agjencisë Kundër Korrupsionit, shihet që Berishaj nuk e ka deklaruar kompaninë e tij ‘MB Consulting’, me pronar dhe punëtor vetë Berishaj, anipse kompania është e regjistruar nga viti 2016 në Mal të Zi.

Bazuar në të dhënat e Agjencisë së Regjistrimit të Bizneseve të Kosovës, Berishaj është në pronësi edhe të dy kompanive të tjera me seli në Kosovë – “Myloja L.L.C.” dhe “Zaslon Kosova L.L.C.”. Asnjërën nga këto nuk i ka deklaruar në formular.

Berishaj ka deklaruar banesë në vlerë prej 180 mijë euro e përfituar në vitin 2001, shtëpi e trashëguar nga 2008 në vlerë prej 72 mijë euro, një tjetër banesë të përfituar në vitin 2006 në vlerë prej 50 mijë euro, dhe tokë me sipërfaqe 62,000.00 m2 e trashëguar nga prindërit në vlerë prej 80 mijë euro.

Pasuri të luajtshme ka deklaruar veturë Mercedes E220 e blerë nga kursimet në vitin 2016 në vlerë prej 15 mijë eurove, dhe një veturë në emrin e bashkëshortes Audi 8 e blerë në vitin 2018 në vlerë prej 42 mijë eurove.

Ka deklaruar para të gatshme në dy banka sllovene, në emrin e vet 15 mijë euro, dhe në emrin e gruas 10 mijë euro.

Të hyrat si ambasador i ka deklaruar në vlerë prej 39,936.00 euro në vit, dhe të hyrat e bashkëshortes në vlerë prej 24 mijë euro në vit.

Mediat sllovene e kishin zbuluar një skandal të madh financiar, ku është i përfshirë Robert Golob, kryetar i Partisë së Lirisë. Në këtë aferë, ku dyshohet për shpëlarje parash, duket që është përfshirë edhe ambasadori i Kosovës në Kroaci, Martin Berishaj, i cili ka qenë edhe anëtar i kryesisë së Vetëvendosjes, ku mediat sllovene tregojnë që i ka bartur në para kesh rreth 600 mijë euro nga kompania e tij në Mal të Zi për tek politikani slloven.

Tri ditë para zgjedhjeve të përgjithshme, në Slloveni ka shpërthyer një skandal i madh financiar, ku është i përfshirë kryetari i Partisë së Lirisë, Robert Golob, e që sipas të gjitha gjasave edhe ambasadori i Kosovës në Kroaci, Martin Berishaj.

Një televizion slloven, Planet TV, ka raportuar se mbi gjysmë milion euro, në kesh, janë bartur prej Malit të Zi për në Slloveni, kurse rolin e mushkës, ose të transportuesit të parave e ka kryer ambasadori i Kosovës, z. Berishaj.

Televizioni slloven, në  një kronikëtregonte se në xhirollogarinë e MB Consulting, e regjistruar në Mal të Zi, nga një kompani serbe janë derdhur në baza të rregullta prej 5 mijë deri në 50 mijë euro, për çdo muaj. Pronari i vetëm i kompanisë MB Consulting, në bazë të dokumentacionit zyrtar, është Martin Berishaj.

Televizioni slloven ka raportuar se një pjesë e dokumentacionit të siguruar tregon se ngjarja në fjalë është shtrirë në vitet 2019 dhe 2020.

Pagesat janë kryer nga dega për Serbi e GEN (kompani energjetike) te kompania private MB Consulting në Mal të Zi, me të cilën kompani GEN ka marrëveshje për këshillime. Janë realizuar pagesa mujore prej 5 deri në 55 mijë euro në muaj, ose gjithsej mbi gjysmë milioni euro.

Ajo çfarë mund të konstatohet është që në të dhënat e regjistrimit të biznesit, MB Consulting, është edhe numri i njëjtë edhe emaili i njëjtë i z. Berishaj, të cilat ai i ka në Ministrinë e Punëve të Jashtme të Kosovës dhe në faqen e tij të Facebook-ut.

“Televizioni Planet ka mësuar se kompania malazeze (ajo ku pronar është Berishaj) është themeluar vetëm 10 ditë përpara se të bëhej pagesa e parë e parave nga kompania GEN e Beogradit”.

Media sllovene tregon që gjëja që e ka tërhequr më së shumti vëmendjen e hetuesve ka qenë fakti që pothuajse 600 mijë euro nga kompania MB Consulting rregullisht janë tërhequr në kesh. /Demokracia.com/

Të ngjashme