Ministria e Punëve të Jashtme dhe Diasporës ka hapur një tender në vlerë 90 mijë euro për mirëmbajtjen dhe servisimin e automjeteve. Ditë më parë, ky institucion ka dhënë edhe 4 mijë e 799 euro për ndërrimin e gomave.
Nuk kanë kaluar më shumë se 20 ditë kur Ministria e Punëve të Jashtme dhe Diasporës ka dhënë një tender për furnizim me goma për BMW në vlerë 4 mijë e 799 euro.
E pas këtij tenderi tash radhën e ka edhe një tjetër, po ashtu për vetura. Fjala është për mirëmbajtjen dhe servisimin e automjeteve, shkruan Demokracia.com.
Ky tender që është hapur gjatë ditës së djeshme kap vlerën e 90 mijë eurove.
“Mirëmbajtja dhe servisimi i automjeteve të MPJD. Vlera e parashikuar e kontratës: 90,000.00 euro. Grupi 1. Mirëmbajtja dhe servisimi i automjeteve të MPJD Grupi 2. Mirëmbajtja dhe servisimi i automjeteve të MPJD-BMW. Afati i fundit për pranim të tenderëve / aplikacioneve: data 18.07.2024”, thuhet në njoftimin e shpallur.
Ministria ka treguar edhe disa kushte për kompaninë fituese dhe ka kërkuar që ajo të jetë sa më afër objektit të ministrisë.
“OE duhet të ketë hapësirën e objektit te (servisimeve) min. 200 m2. Kjo hapësirë duhet të jetë e mbyllur dhe e mbrojtur nga ndikimet e faktorëve të jashtëm, siç janë reshjet, era, pluhuri etj, dhe jo më larg se 15 km nga ndërtesa qendrore e MPJD-së, rr. Luan Haradinaj pn, Prishtinë”.
Ky institucion ka renditur edhe disa pika të veçanta se çfarë do të ndërrohet e servisohet nëpër vetura.
o Servisimi i rregullt përfshin: furnizimin dhe shërbimin e ndërrimit të vajit të motorit, ndërrimin e filterit të vajit, ndërrimin e filterit të naftës, ndërrimin e filterit të ajrit, ndërrimin e filterit të klimës dhe kontrollimin komplet të automjetit.
o Ndërrimi i vajit të motorit, filtrave, vajit në ndërruesit automatik, pjesëve të automjeteve, duhet të kryhet sipas standardit nga prodhuesi i automjetit, garancioni i vajit, orari i servisimit i rregullt kërkohet të jenë së paku në 7000 km dhe në përputhje me rekomandimet e prodhuesit të automjeteve.
o Në çmim për çdo pozicion duhet të llogaritet çmimi i pjesës (ÇP) dhe çmimi i shërbimit (ÇSH) për secilin pozicion për furnizim/shërbim/punë që është përshkruar te Pjesa C, Lista e çmimeve – oferta financiare të dosjes së tenderit.
o Pjesët të cilat montohen në automjetet tona duhet t’i plotësojnë kriteret e prodhuesit të automjetit dhe të jenë origjinal. Garancioni për pjesët që ndrrohen duhet të jetë minimumi 12 muaj.
o Në çdo fushë të zbrazët te Lista e çmimeve vendosni çmimet, në të kundërtën oferta e juaj nuk do të vlerësohet dhe do të shpallet e papërgjegjshme.
o Riparimi/ servisimi i automjeteve duhet të kryhet vetëm në servisin me të cilin është nënshkruar kontrata. Nuk lejohet dërgimi i automjetit në ndonjë servis tjetër.
Demokracia.com ka raportuar ditë më parë sesi Ministria e Punëve të Jashtme dhe Diasporës ka dhënë një tender për furnizim me goma për BMW. Vlera e këtij tenderi ishte 4 mijë e 799 euro.
DOKUMENT | Me para të shtetit, Donika Gërvalla porositë goma “speciale” për BMW-të
Demokracia.com ka shkruar disa herë për tenderët që janë dhënë për veturat BMW të këtij institucioni.
Madje, në një rast, Demokracia.com ka raportuar sesi Donika Gërvalla, veturat BMW i kishte dërguar në Maqedoninë e Veriut për servisim.
