MPJD-ja është ‘bombarduar’ me kërkesa për pajisje të dokumenteve të udhëtimit nga diaspora. Ajo ka hapur tender pas dy muajsh, pasi e ka shkëputur kontratën me kompaninë që nuk e përmbushi detyrën, shkruan Demokracia.com.

Ministria e Punëve të Jashtme dhe Diasporës (MPJD), e drejtuar nga Donika Gërvalla, është përballur me një fluks të madh kërkesash nga diaspora për pajisje me dokumente të udhëtimit. Kjo ka ndodhur pasi MPJD-ja ka shkëputur kontratën me kompaninë A.L. DUSHI SH.P.K, e cila nuk i ka përmbushur detyrat e saj për dërgesat postare. Pas dy muajsh, ministria ka shpallur një tender të ri për shërbimet postare diplomatike, me një vlerë prej 250 mijë euro për 36 muaj.

Tenderi është titulluar “Shërbimet Postare Diplomatike” dhe sipas Ligjit të Prokurimit Publik (LPP), afati për dorëzimin e ofertave për tenderët e mëdhenj është 40 ditë. Megjithatë, MPJD-ja ka shkurtuar këtë afat në 16 ditë, duke thënë se ofertat do të hapen më 29 nëntor. Ministria ka justifikuar këtë veprim, duke theksuar kërkesën e madhe për pajisje me dokumente udhëtimi, të cilat janë të domosdoshme për lehtësimin e lëvizjes së qytetarëve shqiptarë, veçanërisht të diasporës.

“Momentalisht jemi pa kontratë dhe nevoja për këto shërbime është urgjente. Kemi kërkesa të shumta për pajisje me dokumente të udhëtimit, të cilat janë të nevojshme për lehtësimin e lëvizjes të qytetarëve tanë, sidomos për diasporën”, thuhet në njoftimin e kontratës, pikërisht në seksionin IV.3.3, që lidhet me afatin për dorëzimin e ofertave.

Demokracia.com raportoi para pak ditësh se MPJD-ja ndërpreu kontratën e saj me “A.L. Dushi Sh.p.k.” për shkelje të përsëritura në përmbushjen e afateve për dërgesat diplomatike. Kontrata e numëruar 216-23-13152-2-1-1 u ndërpre pas rekomandimit të menaxherit të kontratës, për shkak të dështimeve të kompanisë në dorëzimet e dërgesave diplomatike brenda afateve të specifikuara.

Dështimi i kësaj kompanie në përmbushjen e afateve kohore u shoqërua me një incident të rëndë më 1 korrik 2024, kur një dërgesë nga Ambasada e Kosovës në Romë mbërriti me zarfe të dëmtuara, përfshirë lëndë gjyqësore. Më pas u raportuan vonesa të tjera, përfshirë mosdorëzimin e dërgesave diplomatike në ambasadën në Bern më 17 korrik 2024, të cilat ishin lënë në një postë publike jashtë ndërtesës së ambasadës.

Pavarësisht vërejtjeve dhe paralajmërimeve nga menaxheri i kontratës, “A.L. Dushi Sh.p.k.” vazhdoi të dështojë në përmbushjen e afateve. Për këtë arsye, kontrata prej 250,000 eurosh u ndërpre dhe deri në atë moment, kompania kishte kryer vetëm 22,177.78 euro për periudhën qershor-shtator. Vendimi u mor pas një shqyrtimi të hollësishëm të situatës dhe shkeljeve të njëpasnjëshme.

Kjo çështje e ndërlikuar tregon për problematikat në përzgjedhjen e operatorëve për shërbime kyçe, si ato diplomatike dhe vë në pikëpyetje standardet e konkurrencës dhe përputhshmërisë me Ligjin në Prokurimet Publike në vend. /Demokracia.com/