“Down Syndrome Kosova” ka informuar për pranimin e një raporti se ndaj një fëmijë me këtë sindrom është ushtruar dhunë dhe i njëjti më pas është hedhur në ujë në Velipojë me datën 6 korrik, duke ia rrezikuar jetën.

Kjo organizatë në raportin që ka pranuar njoftoi se dhuna u ushtrua nga përfaqësuesi i qendrës së OPFAKOS në Pejë, me inicialet I.B, në praninë e stafit të OJQ-së në fjalë dhe pjesëmarrësve të tjerë.

“Dëshmitari i pranishëm M.M (i gatshëm të dëshmoj para organeve kompetente) raportoj se me datë 6 korrik 2023 në hapësirë publike, plazh në Velipojë, Republika e Shqipërisë, i lartë cekuri ka ushtruar dhunë fizike dhe më pas e ka hedhur në ujë fëmijën duke ia rrezikuar jetën”, njoftoi organizata.

Policia ka konfirmuar se është identifikuar i dyshuari dhe thotë se ndodhet në fazën e mbledhjes së dëshmive.

Veprimet po kryhen në koordinim me prokurorinë, tha policia për Express.

“Ne e kemi identifikuar personin e dyshuar, dhe jemi nё fazen e mbledhjes sё dëshmive, deri më tani nuk ka ndonjё person tё arrestuar. Tё gjitha veprimet janë duke u kryer në koordinim me prokuroren kujdestare nga Prokuroria Themelore ne Pejë”, thuhet në përgjigjen e policisë së Pejës, dhënë Gazetës Express.

Edhe zëdhënësi i Prokurorisë Themelore në Pejë, Shkodran Nikçi tha të hënën për Express se lidhur me rastin është autorizuar policia për të ndërmarrë veprimet e nevojshme.

“Me të parë reagimin publik të këtij rasti, Prokurori i Shtetit ka autorizuar menjëherë Policinë e Kosovës për t’i ndërmarrë të gjitha veprimet e nevojshme”, tha Nikçi për Express.

Organizata thekson se dhuna është e papranueshme dhe u bën thirrje të gjitha organeve ligjzbatuese që rasti në fjalë të trajtohet në mënyrë të drejtë dhe profesionale.

“Si DSK, kemi kontaktuar  prindin e fëmijës i cili e ka konfirmuar që personi në fjalë ka ushtruar dhunë ndaj fëmijës së tij, por për arsye të panjohura për ne (DSK),  prindi nuk ka pranuar të  denoncoj rastin. Megjithatë  për  DSK-ën, çdo formë e dhunës është e papranushme dhe ne ndjejmë obligim ligjor  dhe konform misionit tonë t’i marrim masat e nevojshme për trajtim të rastit”, thuhet tutje në postimin e organizatës.