Një zjarr i madh ka shpërthyer në një treg popullor Krishtlindjesh në Berlin ndërsa turistët u larguan nga zona dhe dy persona u dërguan me urgjencë në spital.

Sipas mediave të huaja, përcjell Telegrafi, imazhet dramatike tregojnë shtëllunga të mëdha tymi që ngrihen mbi tregun përballë Rotes Rathaus (bashkia e kuqe e qytetit) në kryeqytetin gjerman të martën në mbrëmje.

Dy persona u dërguan me urgjencë në spital me lëndime pas zjarrit, i cili tani është shuar, thanë shërbimet e urgjencës.

Zjarri përfshiu dy tezga të cilat shisnin mallra festive.

Mediat më tej kanë raportuar se ndërsa ekipet e zjarrfikësve po luftonin me zjarrin, dy bombola të vogla gazi shpërthyen.

Lajmi vjen vetëm një javë pasi dy persona u arrestuan në North Rhine-Westphalia dhe Brandenburg pasi dyshohet se kishin komplotuar sulme në tregjet e Krishtlindjeve.