Vendenis Lahun mund ta njohin shumë persona nga vendi prej kah vjen, Podujeva. Por, kur ai ulet në ulësen e deputetit të Kuvendin të Kosovës, është shumë zor që të zbulohet emri i tij nga shikuesit që e përcjellin Kuvendin. Sepse, ai nuk bënë ‘gëk’ as ‘mëk’ kurrë në foltore. Kryesisht është spektator. Por, pasuria që i është zbuluar së fundmi tregon se nuk kemi të bëjmë me një person të rëndomtë, shkruan Demokracia.com.
Lahu është deputet i Kuvendit të Kosovës dhe vjen nga radhët e Lëvizjes Vetëvendosje. Ai ka shkruar në deklarimin e pasurisë, i cili i është publikuar para pak javëve që posedon disa lloje të kriptovalutave që i ka përfituar në vitin 2022. Të njëjtat nuk i ka deklaruar edhe në deklarimin e vitit paraprak.
Kështu, ai ka kryer vepër penale ‘mosdeklarim i pasurisë’, apo ‘deklarim i rrejshëm’.
Por, deputeti Lahu në deklarimin e bërë më datë 31.03.2024, ka shkruar se ka investuar në monedha digjitale (kriptovaluta), në 13 lloje. Vlera e investimeve është rreth 93 mijë euro.
Të gjitha investimet është shkuar se janë bërë në shkurt të vitit 2022. Të njëjtat nuk figurojnë edhe në deklarimin e vitit 2023, të cilat është dashur të evidentohen. Për shembull, një numër i konsiderueshëm i zyrtarëve publikë kanë deklaruar se posedojnë kriptovaluta që disa vite dhe të njëjtat i deklarojnë çdo vit. Herë si rënie në investime e herë si ngritje.
Deputeti “misterioz” i VV-së është edhe mjek në Qendrën Klinike Universitare të Kosovës. Ai është mjaft i pasur edhe sa i përket parave të ruajtura në institucionet financiare.
Në vitin 2023, në bankë, në emrin e tij kishte deklaruar vetëm 5,108.00 euro, ndërsa siç shihet, një vit më vonë ka deklaruar rreth 95 mijë euro në emrin e tij. Derisa në vitin e kaluar, në emër të prindit kishte deklaruar rreth 85 mijë euro.
Këtë vit, deklarimi i parave në emër të prindit është zero dhe krejt paratë janë në emrin e tij. Kurse të hyrat vjetore për 2023 nga Ordinanca Specialistike Internistike, që e ka në emër të prindit janë deklaruar në vlerë prej 17,341.00 euro. Të hyrat e tij prej deputeti kanë qenë 20,880.00 euro dhe 1,289.31 euro nga QKUK. /Demokracia.com/