Njerëzit që po udhëheqin me prokurimin e shtetit kanë hapur kompani ose janë bërë bashkëpronarë në to dhe tash po përfitojnë edhe vetë nga tenderët publikë, shkruan Demokracia.com.
Behgjet Rrukiqi është zëvendësues i Drejtorit të Përgjithshëm në Agjencinë Qendrore të Prokurimit Publik (AQP). Në fillim të vitit 2023, ai është bërë pronar i kompanisë EURO – SERVICES SH.P.K. Vetëm pak muaj pasi ishte bërë pronar në kompani, ka lidhur kontratë me Ministrinë e Punëve të Brendshme për tenderin “Ndërtimi i SHFMU në Pozharan – Komuna e Vitisë – vazhdimi i punimeve”.
Faktikisht, “Euro-Services” ka qenë në konsorcium edhe me dy kompani, ku lider i grupit është kompania “AAG Projekt” SH.P.K dhe pjesë e tyre është edhe “Ac ing” SH.P.K. Çmimi i kontratës është 743,609.12 euro.
Kjo kontratë është lidhur në shkurt të këtij viti. Por, ka rezultuar se projekti nuk ka qenë në rregull. Ministria ka nënshkruar një kontratë të dytë javën e kaluar për këtë projekt me konsorciumin e njëjtë në një vlerë prej 73,705.56 euro. Ligji i Prokurimit Publik lejon nënshkrimin e kontratave të negociuara për punët shtesë deri në vlerën maksimale të 10 për qind të kontratës bazë. Zakonisht, punët shtesë dalin 5, 6 apo 7 për qind. Është interesante se këtu kanë dalë punë shtesë fiks 9.92 për qind ose 73,705.56 euro.
Ky aktivitet i prokurimit kishte qëndruar për disa muaj në OSHP, para se te lidhej kontrata në shkurt.
Demokracia.com kishte parë se njëra nga kompanitë, “EURO – SERVICES SH.P.K”, ishte në pronësi të udhëheqësit të AQP-së, Behgjet Rrukiqi. Deri në janar të vitit të kaluar, ajo ka qenë në emrin e dy vëllezërve të tij.
Tenderi ishte hapur qysh më 14 mars 2023, por për shkak të ankesave prej kompanive është zvarritur për disa muaj. Pastaj, siç ka gjetur Demokracia.com, vetë autoriteti kontraktues kishte bërë gabime në dosjen e tenderit që në start dhe më pas e kishte korrigjuar atë katër herë të ndryshme, duke e vonuar procesin.
Behgjet Rrukiqi ka qenë edhe Drejtor i Përgjithshëm në AQP. Bazuar në të dhënat e ARBK-së, ai posedon 100 për qind të aksioneve te kompania në konsorcium, e cila ka dalë fituese në tenderin e QKUK-së, ndërsa drejtor i kompanisë është Ekrem Sadiku. /Demokracia.com/
Lexo edhe:
