Nënkryetarja e PDK-së, Vlora Çitaku ka thënë se kryeministri Kurti nuk ka thënë asgjë në seancën e djeshme të Kuvendit të Kosovës dhe se marrëveshja e propozimit evropian ka shumë dykuptimësi.

“Kjo marrëveshje nuk ka pikur nga qielli, është produkt i negocimit disavjeçarë të kryeministrit. Duket që kryeministri e ka lexuar gabimisht kontekstin e ri gjeopolitik pas agresionit të paprovokuar të Rusisë në Ukrainë”, ka thënë Çitaku.

“Në vend të angazhohet seriozisht në procesin e dialogut dhe në fund të kësaj marrëveshje të kemi një marrëveshje gjithëpërfshirëse, me njohje reciproke në qendër, ne kemi një marrëveshje të përkoshme, e cila më shumë ngjason si armëpushim”, ka thënë tutje Çitaku.

Nënkryetarja e PDK-së ka thënë se kryeministri Kurti në momente më kritike të shtetit, në vend që të flasë për dialog dhe për arritje të marrëveshjes, ka folur për luftë. Ajo shtoi se gjatë qëndrimit të saj në ShBA ka pasur keqkuptime dhe e kanë pyetur se nëse do të hyjnë në luftë për targa.

“Ky është rrëfimi që kryeministri me pamaturinë e tij dhe me sjelljen tejet të papërgjegjshme dhe aventureske, ka krijuar një situatë, ku është rritur shqetësimi në BE dhe SHBA për sigurinë në Kosovë dhe rajon”, ka shtuar Çitaku në emisionin “FIVE” në RTV Dukagjini.

Nënkryetarja e PDK-së ka shtuar se kjo situatë ka mundësuar që aleatët tanë ndërkombëtarë fokusin nga zgjidhja politike e kanë sjellë tek ajo e sigurisë.