Çitaku e konsideron pazar kalimin e deputetes Grainca në LVV

Lajme

Demokracia

11:18 | 05 Prill 2021

Ish-ambasadorja e Kosovës në Shtetet e Bashkuara të Amerikës, Vlora Çitaku e vlerëson si pazar kalimin e deputetes Adelina Grainca nga Partia Demokratike e Kosovës në Lëvizjen Vetëvendosje.

Çitaku ka thënë se deputetja Grainca ka mungesë të vetëdijes politike.

“Herë ndryshojnë rrethanat, e herë ndryshojmë vet. Ama, me ndryshu tabore politike brenda orës, pa asnjë arsye të artikuluar, është as më shumë e as më pak se mungesë elementare e vetëdijes politike. Është reduktim i politikës në pazar”, shkroi Çitaku në Facebook.

Postimi i plotë i Çitakut:

Me ndërru mendjen, qëndrimin dhe pozicionimin politik në demokraci është normale.

Herë ndryshojnë rrethanat, e herë ndryshojmë vet. Ama, me ndryshu tabore politike brenda orës, pa asnjë arsye të artikuluar, është as më shumë e as më pak se mungesë elementare e vetëdijes politike. Është reduktim i politikës në pazar.

Deputetja Grainca nuk kaloi në VV sepse donte që Kosova me çdo kusht të shmangte zgjedhjet e parakohshme, sepse zonja Grainca hyri në sallë në raundin e dytë, dhe vota e sajë ishte e panevojshme; as pse kishte shprehur ndonjë paknaqësi ne grupin e sajë parlamentar lidhur me orientimet politike të PDK-së.

Motivin e din më së miri ajo vet, por aman mos na e veshni oportunizmin politik me interes për Kosovën e sakrificë.

Poashtu, shpresoj që Partia Demokratike e Kosovës të marrë mësim. Të nisë procesin e reformave. Opozita është gjithmonë e rëndësishme, e posaçërisht tani./Demokracia/