Zëvendëskryeministri i Kosovës, Besnik Bislimi, ka deklaruar se shtyrja e zgjedhjeve në veri nuk do të ishte opsion e mirë, pasi sipas tij, shtyrja do ta paraqiste veriun si zonë të menaxhimit të krizave, e jo si proces i normalizimit të raporteve.
Bislimi ka thënë për Zërin e Amerikës të enjten se ka vullnet nga partitë politike për pjesëmarrje në zgjedhje, pos Listës Serbe, që siç u shpreh ai, ky subjekt do ta kamuflojë rënien e besimit.
“Zgjedhjet janë themel i demokracisë dhe në një demokraci të mirëfilltë janë institucionet shtetërore që i vendosin afatet për mbajtjet e tyre. Për zgjedhjet ka vullnet nga partitë që të jenë pjesëmarrëse. Ky vullnet mungon vetëm një subjekt politik dhe do të ishte gabim që vullneti politik i shumicës t’i nënshtrohet interesave joparimore të një subjekti politik. Ne besojmë që deklarimin për mospjesëmarrje në zgjedhje e kanë jo për kalkulime momentale, por duke qenë se kanë parë rënien e besimit, duan ta kamuflojnë përmes ikjes nga mbajtja e zgjedhjeve. Shtyrja s’është opsion i mirë. Është opsion i atyre që mendojnë se në këtë moment më mirë është që veriu të jetë zonë e menaxhimit të krizave, e jo të hyjë në proces të normalizimit të raporteve”, ka thënë ai.
Së fundmi, kryetari i Aleancës për Ardhmërinë e Kosovës, Ramush Haradinaj, kërkoi shtyrjen e zgjedhjeve.
