Lajme
Bislimi ndryshon qëndrimin për planin franko-gjerman, nga plan më afër Serbisë në njohje reciproke
Demokracia
15:00 | 08 Shkurt 2023

Share:

Zëvendëskryeministriq i Kosovës, Besnik Bislimi, e ka ndryshuar sot qëndrimin e tij për planin franko-gjerman.

Veç një muaj më parë ai thoshte se ky plan qëndron më afër Serbisë, por sot ka thënë se ky plan tregon kornizat bazë dhe se e  përmban brenda njohjen ndërmjet dy shteteve, shkruan Demokracia.com.

Sipas tij, shefi i qeverisë Albin Kurti, pas takimit që pati me emisarin special të BE-së për dialogun Kosovë – Serbi, Miroslav Lajçak, ka nxjerr informatën që ai [Kurti] është dakord me plaformën e propozuar nga plani franko-gjerman.

Bislimi tha se plani franko-gjerman i tregon kornizat bazë, që sipas tij, kjo nënkupton njohjen de-facto në mes Kosovës e Serbisë. Ndersa, siç tha ai, sekuencimi i hapave do të diskutohet në Bruksel.

“Ajo që Kurti ka nxjerr pas takimit është informata që ai është dakord me platformën e propozuar nga plani franko-gjerman, me mbështetje të ShBA-së. Platforma tregon vetëm principet dhe veprimet bazë, ndërsa gjithçka që ka të bëjë me implementimin e saj duhet të diskutohet në aneksin implementues mes palëve në Bruksel”.

“Plani franko-gjerman i tregon kornizat bazë, që nënkupton njohjen de-facto të të dy shteteve, ndërkaq se si do të jetë sekuencimi i hapave, cilat marrëveshje nuk janë më të rëndësishme, cilat duhet të modifikohen e cilat duhet të zbatohen, për këtë diskutojnë palët në Bruksel”, është shprehur Bislimi, njofton Klankosova.

Tutje, ai tha se gjatë takimit që ai pati bashkë me Kurtin e Lajçakun, nuk ka pasur diskutim për asnjë marrëveshje paraprake, duke lënë të nënkuptohet që nuk është folur për Asociacionin e Komunave me Shumicë serbe.

Ndërsa, sipas Bislimit, Bashkimi Evropian ka vërejtjet e saja në dy kushtet, nga gjashtë sa i ka propozuar kryeministri i vendit, Albin Kurti, në lidhje me formimin e Asociacionit.

“Gjashtë kushtet që i ka prezantuar kryeministri Kurti janë parakushte që tregojnë se mund të diskutohet për mekanizmin e avancuar të mbrojtjes së të drejtave të minoriteteve. BE-ja ka vërejtjet e saj në dy kushte, por cilat janë ato dhe pse ka vërejtje mund ta pyesni Lajçakun kur është në Prishtinë”, është shprehur Bislimi.

Të ngjashme