Bilibili, kompania kineze e quajtur shpesh “YouTube i Kinës”, është treguar mjaft modeste në deklaratën ku shpreh misionin e saj. Në vend që të premtojë se do të ndryshojë botën, firma thjesht aspiron të “pasurojë jetën e përditshme të brezave të rinj në Kinë”.
Po të merrnim si referencë numrin e përdoruesve, do të dilnim në përfundimin se të rinjtë kinezë janë me të vërtetë të entuziazmuar. Në tremujorin e fundit të vitit 2020, numri i personave që përdorën këtë shërbim të paktën një herë në muaj, u dyfishua në krahasim me një vit më parë, duke arritur në 202 milionë. Gati nëntë në dhjetë persona ishin nën moshën 35 vjeç. Videot në platformë, të cilat variojnë nga eventet kryesore sportive, deri te leksionet e vetëndihmës dhe gjithçka e ndërmjetme, tërheqin mesatarisht 1.2 miliardë klikime në ditë.
Bilibili u lançua në vitin 2009, si një faqe online për fansat e animacioneve japoneze, dhe më pas u shndërrua në një faqe argëtuese të larmishme. Në muajt e fundit, edhe muzikantët perëndimorë (si Jessie J dhe Charlie Puth) dhe yjet e Hollivudit (si Dwayne Johnson) kanë nxituar që të krijojnë llogari në Bilibili. Faqja ka tërhequr edhe vëmendjen e investitorëve. Midis marsit 2018, në kohën kur kompania u listua në bursën e Nju Jorkut, dhe shkurtit të këtij viti, kapitalizimi i saj në treg u rrit më shumë se dhjetë herë, duke arritur në 41 miliardë dollarë. Më 23 mars, ajo arriti vlerën 2.6 miliardë dollarë në një listim dytësor në Hong Kong.
Ndryshe nga YouTube, Bilibili nuk pranon që t’i bombardojë me reklama videot e krijuara nga përdoruesit. Në këtë mënyrë, ajo mund të tërheqë përdorues të rinj, të cilët bezdisen nga ndërprerje të tilla dhe mund t’i bindë ata të kalojnë më shumë kohë në platformë. Qëllimi kryesor, siç thonë drejtuesit, është të “shndërrojë” këtë “komunitet ngjitës” në “përdorues me pagesë”.
Bilibili e bën këtë në dy mënyra kryesore: duke ofruar lojëra ku lojtarët blejnë artikuj virtualë për të avancuar në nivelin tjetër dhe duke ofruar akses në filma dhe seriale origjinale dhe të licencuara. Ky biznes i ngjashëm me Netflix, i nisur në vitin 2018, tani ka 14.5 milionë abonentë me pagesë.
Pjesa e përdoruesve që paguajnë për gjëra si aksesorë shtesë në lojë dhe abonime, është rritur nga 3.9% në vitin 2018 në 8.0% në vitin 2020. Të ardhurat nga këto burime i dyfishuan të ardhurat e Bilibili në secilin prej tre viteve të fundit, duke arritur në 12 miliardë juanë (1.7 miliardë dollarë) në vitin 2020. Ajo shet gjithashtu reklama në disa pjesë të platformës së saj, por ato përbëjnë më pak se një të pestën e shitjeve (krahasuar me shumicën dërrmuese në YouTube).
Megjithatë, kompania ka pasur edhe vështirësi financiare. Vitin e kaluar, Bilibili raportoi një humbje operative prej 3 miliardë juanësh, sa dyfishi në vitin 2019. Fitimet mund të bëhen të vështira dhe kompania duhet të investojë për të mbajtur në platformë një sërë lojërash tërheqëse dhe paguan shumë për të drejtat e filmave të njohur që kërkohen edhe nga rivalë të mëdhenj të transmetimit, si kompania iQiyi.
Drejtuesit e Bilibili janë në mëdyshje. “Ndërsa të ardhurat tona neto vazhdojnë të rriten, ne nuk presim që kostot tona totale si përqindje e të ardhurave totale të rriten ndjeshëm”, shkruajnë ata. Çmimi i aksioneve të kompanisë, që është ulur me një të tretën që nga kulmi i arritur në shkurt, tregon se investitorët, më në fund, duan të shohin disa prova.
