Presidenti i SHBA Joe Biden  ka urdhëruar agjencitë e inteligjencës amerikane të ndërmarrin hapa për të “siguruar më tej” informacionin e klasifikuar, tha ai në një deklaratë sot, pasi rrjedhja e dokumenteve të klasifikuara e ka vendosur në siklet Uashingtonin.

“Ndërsa ne vazhdojmë të përcaktojmë vërtetësinë e këtyre dokumenteve, unë i kam udhëzuar agjencitë tona ushtarake dhe të inteligjencës që të ndërmarrin hapa për të siguruar dhe kufizuar më tej shpërndarjen e informacionit të ndjeshëm,” tha Biden.

“Ekipi ynë i sigurisë kombëtare po koordinon ngushtë me partnerët dhe aleatët tanë”, shtoi më tej ai. Presidenti përgëzoi gjithashtu zbatimin e ligjit për hetimin e tyre dhe përgjigjen “e shpejtë” ndaj rrjedhjes së këtyre dokumenteve të klasifikuara.