Deputeti i PDK, Artan Behrami është takuar me kongresistin amerikan Pete Sessions, përfaqësues i Partisë Republikane.

Behrami përmes një postimi në Facebook njoftoi se  Sessions i kërkoi që të adresoi në kongres shqetësimet për procesin gjyqësor në Hagë.

“Në takim shpjegova në hollësi procesin e deformuar përplot padrejtësi që është duke udhëhequr Gjykata Speciale kundër krerëve të UÇK-së në Hagë”, shkroi ai mes tjerash

Postimi i plotë:

Kosova është me të vërtetë e bekuar me miqësinë e palëkundur të Shteteve të Bashkuara të Amerikës!

Pata kënaqësinë të pritem në një takim nga Kongresmeni shumë aktiv, Pete Sessions, përfaqësues i Partisë Republikane.

Diskutuam për rolin jetik të SHBA-së dhe të Presidentit Donald Trump në forcimin e sigurisë, paqes dhe zhvillimit ekonomik në Kosovë.

Kongresmeni Sessions tregoi interesim të veçantë për të kuptuar më mirë se si Kongresi amerikan mund të kontribuojë më shumë për të shtyrë prioritetet e shtetit të Kosovës në kongres.

Në takim shpjegova në hollësi procesin e deformuar përplot padrejtësi që është duke udhëhequr Gjykata Speciale kundër krerëve të UÇK-së në Hagë.

Kërkova mbështetjen e tij për të adresuar këto shqetësime në kongres, për të shmangur çdo devijim të mundshëm dhe mundësuar një verdikt të pavarur, fer dhe të paanshëm.