SZA, Victoria Monét dhe Phoebe Bridgers janë tri prej artistëve më të nominuar sivjet në këtë ngjarje të madhe.

Ndërkohë, nominime në ‘Grammy Awards 202’ kanë arritur të marrin edhe dy këngëtaret shqiptare me famë botërore: Bebe Rexha dhe Dua Lipa.

Bebe Rexha është nominuar për çmimin “Kënga më e mirë ritmike e zhanrit elektronik” për hitin e saj “One in a Million” në bashkëpunim me David Guettan.

Ndërsa Dua Lipa është nominuar për dy çmime, “Kënga më e mirë e vitit” dhe “Kënga më e mirë e kompozuar për mediat vizuele” – të dyjat për këngën e saj “Dance The Night” nga filmi “Barbie”.

E lumtur nga suksesi në fjalë, Dua publikoi një sërë imazhesh në llogarinë e saj në Instagram, të cilat ishin shkrepur nga prapaskenat e klipit të saj më të fundit “Houdini”.

“10 milionë shikime për ‘Houdini’ në më pak se 24 orë dhe dy nominime ‘Grammy’ për ‘Dance The Night’. Çfarë dite. Faleminderit, faleminderit”, shkroi artistja nga Kosova në mbishkrimin e fotografive.

Ndërkohë, edhe Bebe Rexha ndau me ndjekësit e saj një fotografi të përbashkët me David Guettan, e cila tregonte se ishte nominuar për një çmim në ‘Grammy Awards 2024’.

“Faelminderit Akademisë së Regjistrimit që vendosët një buzëqeshje në fytyrën time sot”, shkroi Rexha në Instagram.

Përndryshe, 34-vjeçarja ka qenë e nominuar edhe vitin e kaluar për çmimin ‘Kënga më e mirë ritmike/elektronike’ për hitin e saj “I’m Good (Blue)”, por fatkeqësisht u mund nga Beyonce, e cila e fitoi çmimin në fjalë me këngën “Break My Soul”.