Ballkani nuk ka arritur më shumë se një pikë nga udhëtimi i vështirë në Gjilan.

“Portokallezinjtë” barazuan pa gola 0-0 me Dritën në kryendeshjen e javës së katërt në elitën e futbollit kosovar, shkruan Demokracia.com.

Numri një i stolit suharekas, Bekim Isufi deklaroi se barazimi ishte epilog real i kësaj sfide.

“Mendoj se dy ekipet e kishim studiuar mirë njëra tjetrën dhe për këtë arsye kishte pak raste gjatë ndeshje, Ndoshta, tifozët nuk janë të kënaqur me rezultatin, por duhet të jenë të kënaqur me lojën e treguar në fushë. Të dyja ekipet nuk donin të bënin gabime dhe ishte një lojë e kalkuluar mirë. Ndoshta, në fillim të ndeshjes ishim paksa më të mirë, por pastaj patëm vështirësi dhe Drita kishte një dominim të lehtë. Në fund, mund të them se barazimi ishte epilog real. Mos të harrojmë që Drita ka ekip jashtëzakonisht të fortë”, tha Isufi për Art Sport.

Ballkani ka tetë pikë në vendin e parë, po aq sa ka edhe Drita një pozitë më poshtë. /Demokracia.com