Më 2 tetor të vitit 2008, Qeveria e Kosovës kishte marrë vendim për privatizimin e distribuimit dhe furnizimit të Korporatës Energjetike të Kosovës (KEK). Dy muaj më vonë, në dhjetor të të njëjtit vit, ky vendim mori mbështetje edhe nga Kuvendi i Kosovës. Për transaksionin, Kosova ishte këshilluar nga Korporata Ndërkombëtare Financiare (IFC), anëtare e Bankës Botërore. Ndërsa, në një raport të publikuar pas privatizimit, Banka Botërore e lavdëronte shumë këtë proces.

Në vitin 2008, IFC kishte nisur këshillimin e Qeverisë së Kosovës për strukturimin dhe tenderimin e privatizimit. Konzorciumi turk, Çalik-Limak, kishte fituar tenderin për ta blerë KEDS-in për 26.3 milionë euro dhe ishte zotuar që t’i investojë 300 milionë euro përgjatë 20 viteve të ardhshme, transmeton Demokracia.com.

I gjithë procesi, siç paraqitej edhe në raportin e publikuar atëherë nga Banka Botërore, parashihej të përfundonte diku në vitin 2013.

Një prej pikave kryesore që e kishte veçuar Banka Botërore në raportin e saj ishte se Qeveria e Kosovës e kishte marrë shumë seriozisht procesin e privatizimit. Tutje në këtë raport thuhej se Qeveria ka ndjekur praktikat më të mira për privatizimin.

Banka Botërore kishte konstatuar se ky proces kishte shumë aspekte pozitive për shtetin e Kosovës, transmeton Demokracia.com.

Para privatizimit, shpërndarjes dhe shërbimeve të furnizimit, Qeverisë i kushtuan mesatarisht 47 milionë euro subvencione në vit. Nuk kërkoheshin më subvencione pas privatizimit, duke kursyer mesataren prej 47 milionë euro çdo vit. Normat e përmirësuara të mbledhjes së pagesave gjithashtu ndihmuan në sigurimin e buxhetit kombëtar me mbi 50 milionë euro në vit të ardhura shtesë nga TVSH-ja dhe taksa e rentës së qymyrit. Kjo, sipas Bankës Botërore, ka qenë pothuajse 100 milionë euro kthesë vjetore në financat publike si rezultat i privatizimit.

Siç theksohej në këtë raport, para privatizimit, mbi 40% e energjisë elektrike humbiste çdo vit për shkak të teknikës dhe humbjeve komerciale, transmeton Demokracia.com.

Tjetër aspekt pozitiv nga privatizimi, sipas Bankës Botërore, ishte reduktimi i kostos së importit.

Importet e energjisë ishin shumë të shtrenjta dhe para privatizimit kushtonte 77 € për MWh. Brenda një ose dy muajve pas privatizimit, kostoja e importeve ishte ulur me më shumë se 30% dhe kjo mesatare ishte rreth 53 € për MWh, duke siguruar kështu kursime të konsiderueshme dhe duke ndihmuar në mbajtjen e tarifave në Kosovë ndër më të ulëtat në rajon.

Vlen të theksohet se kryeministri aktual i Kosovës, Albin Kurti, ka qenë gjithmonë kundër privatizimit të KEDS-it. Ditë më parë, ai deklaroi se vendi nuk do të ishte në krizë energjetike nëse nuk do të ndodhte ky privatizim.

Gjatë kohës sa ishte në opozitë, Kurti kishte thënë se në rast se bëhet kryeministër do të niste hetime ndaj këtij procesi. /Demokracia.com/